Astana áýejaıy ne úshin ýaqytsha jabyldy

<p>ASTANA. KAZINFORM &ndash; Elorda áýejaıynan barlyq reıs ýaqytsha toqtatylyp, áýejaı eki saǵatqa jabyldy. Tótenshe jaǵdaıǵa qatysty qala áýejaıynyń baspasóz qyzmeti túsinikteme berdi.&nbsp;</p>

«Jergilikti ýaqyt saǵat 16:00-de Swissair áýe kompanııasynyń Tokıodan Tsıýrıhke 777-300ER (rotanyń borttyq nómiri HBJNI) ushqan SVR161 reısi Astana áýejaıyna shuǵyl qondy. Ekıpaj 50 jastaǵy jolaýshynyń ınsýlt alýy kúmándanýyna baılanysty qonýǵa sheshim qabyldaǵan. Saǵat 16:00-de ushaq sátti qonǵannan keıin, ushý-qoný jolyndaǵy burylys kezinde ekıpaj qateliginen ushaq jolaqtan syrǵyp ketti. Osyǵan baılanysty saǵat 16:03-te apattyq-qutqarý jumystaryn júrgizý úshin dabyldy eskertý jarııalandy», - delingen habarlamada.

Foto: Astana áýejaıy

Aqparatta aıtylǵandaı, tótenshe jaǵdaıdan soń elorda áýejaıy eki saǵatqa jabylyp, reıster ýaqytsha toqtatylǵan. 

«Osyǵan oraı áýe reısteriniń keshigýi kútiledi. Jolaýshylardan bolǵan keleńsiz jaǵdaı úshin keshirim suraımyz jáne kidiristerdi azaıtý úshin qoldan kelgenniń bárin jasaımyz. Jaǵdaı bizdiń baqylaýda, tyń aqparat bolsa bólisemiz», - dep tolyqtyrdy áýejaıdyń baspasóz qyzmetinen.