«Astana arlans» boksshylary aýktsıonnan túsken qarjyny naýqas balalarǵa berdi

ATYRAÝ. QazAqparat - «Astana Arlans» komandasynyń músheleri aýktsıonnan túsken qarjyny naýqas balalarǵa tabystady. Qaıyrymdylyq aýktsıonynyń jalpy qory 7 mıllıon teńgeni  qurady, dep habarlaıdy QazAqparat tilshisi.

Aıta keteıik, 26 mamyr kúni búkilálemdik boks serııasynyń (WSB) VIII maýsymynyń jartylaı fınaldyq oıyny aıaqtaldy. Álemdik dodada WSB jobasynyń úsh dúrkin chempıony «Astana Arlans» Ulybrıtanııanyń «BritishLionhearts» komandasymen kezdesip, jeńiske jetti.

Oıyn  sońynda aýktsıon ótkizilip,  «Astana Arlans» komandasynyń sportshylarynyń  qolǵaptary oınatyldy. Aýktsıonnan túsken  qarjy   7 mıllıon teńgeni qurady. Búgin, 29 mamyr kúni túsken qarajattyń barlyǵy naýqas balalar emine jumsaldy.

«Ýáde etkendeı, Atyraý oblystyq sport basqarmasymen birge 2 mıllıon teńgeni kómekke muqtaj Danlo Elersa sındromyna, tserebroastenıkalyq sındromyna shaldyqqan, DTsP jáne epılepsııamen aýratyn 4 naýqas balaǵa tabystadyq. Qalǵan 5 mıllıon teńgeni Koreıa elinde em alyp jatqan Alıma Kópeıdiń emine jiberdik», - deıdi «Astana Arlans» komandasynyń PR-menedjeri Shyńǵys Túsibaev.

Aýyr dıagnoz qoıylyp, shuǵyl túrde emge muqtaj balalar týraly aqparat qalalyq jumyspen qamtý, áleýmettik baǵdarlamalar jáne azamattyq hal aktilerin tirkeý bóliminen alyndy.

«Meniń qyzym sırek kezdesetin Danlo Elersa sındromymen aýyrady. Onyń emine jyl saıyn qomaqty qarajat ketedi, sol sebepti qalalyq bólimnen kómek suraǵan bolatynmyn. Osyndaı qasıetti aıda qoldaý kórsetkenderińizge rahmet. Biz shynymen mundaıdy kútpedik», - deıdi qala turǵyny Dılıara Gılaeva.