«Astana-Almaty» baǵytyndaǵy poıyz apaty: Qylmystyq is qozǵaldy
«2018 jyldyń 17 maýsymynda saǵat 13:45-te Jambyl oblysynyń Shý qalasynan 50 shaqyrym jerde 20 vagonnan turatyn «Astana-Almaty» baǵytyndaǵy jolaýshylar poıyzynyń quramy relsten shyǵyp ketti. Sonyń saldarynan 8 jolaýshylar vagony relsten shyǵyp, ekeýi aýdaryldy. Apat sebepteri anyqtalyp jatyr. Aldyn ala málimetterge sáıkes jolaýshylar poıyzynyń aýdarylýy saldarynan 2006 jylǵy kámelettik jasqa tolmaǵan bala qaıtys boldy. Medıtsınalyq kómekke zardap shekken 11 azamat júginip, olarǵa kómek kórsetildi», - delingen bas kólik prokýratýrasy baspasóz qyzmeti taratqan aqparatta.
Sonymen qatar vedomstvo málimetinshe, oqıǵa ornynda Bas kólik prokýratýrasynyń prokýrory, kóliktegi ishki ister organdarynyń, jergilikti atqarýshy organdardyń, barlyq shuǵyl qyzmetterdiń qyzmetkerleri men Shý qalalyq aýrýhanasynyń jedel járdem kóligi jumys istedi. Shýdyń eki aýrýhanasyna kúsheıtilgen jumys rejimine kóshirildi. Shý stansasynyń jelilik ishki ister bóliminde temir jol qozǵalysy qaýipsizdigi erejesin buzý faktisi boıynsha qylmystyq is qozǵaldy.
«Qylmystyq isti tergeý barysy Bas kólik prokýratýrasynyń baqylaýyna alyndy», - dep atap ótedi vedomstvodan.
Buǵan deıin Astanadan Almatyǵa bara jatqan jolaýshylar poıyzynyń apatqa ushyraǵanyn habarlaǵan bolatynbyz.
Odan keıin «Qazaqstan temir joly» ulttyq kompanııasy «Astana-Almaty» baǵytynda qatynaıtyn poıyzdyń apatqa ushyraýyna qatysty resmı málimdeme jasap, oqıǵanyń shyǵý sebebin tekseretin arnaıy komıssııa qurylǵanyn jarııa etken edi.