Astana, Almaty jáne Shymkent qalalaryna iri kókónis jetkizýshiler bekitiledi

<p>ASTANA. KAZINFORM - Maýsym aıynyń birinshi aptasynda áleýmettik mańyzy bar azyq-túlik ónimderiniń ortasha baǵa ındeksi 0,1%-ǵa tómendedi Óńirlerdegi baǵa kórsetkishi senbi, 8 maýsymda vıtse-premer Serik Jumanǵarınniń tóraǵalyǵymen ótken keńeste qaraldy, dep habarlaıdy Úkimettiń <a href="https://primeminister.kz/news/astana-almaty-zhane-shymkent-kalalaryna-iri-kokonis-zhetkizushiler-bekitiledi-28597" target="_blank" rel="noopener">baspasóz</a> qyzmeti.</p>

Saýda komıtetiniń málimeti boıynsha, bir apta ishinde taýar men kókónistiń 10 túrine baǵa tómendedi: kúrish, qaraqumyq, kúnbaǵys maıy, súzbe, 1 surypty un, taýyq jumyrtqasy, makaron ónimi, sábiz, pııaz jáne qyryqqabat. Kartoptyń baǵasy 4,4%-ǵa kóterildi. Bul kókónis túrine baǵanyń ósýi Astana, Almaty, Ulytaý, Mańǵystaý, Aqtóbe, Soltústik Qazaqstan jáne Jambyl oblystarynda tirkeldi.

Saýda komıtetiniń tóraǵasy Aıdar Ábildabekov atap ótkendeı, egistikten alynǵan jańa ónimniń baǵasy qazir turaqsyz jáne kún saıyn ózgerip otyrady. Degenmen ákimdikterdiń erte shyǵatyn ónimge forvardtyq kelisimsharttardy ýaqtyly jasasýy baǵa aýytqýlaryn retteı alady.

Almatyda áleýmettik ónimderdi jetkizý jaǵdaıyna erekshe nazar aýdaryldy. Bul qala búkil el boıynsha azyq-túlik ınflıatsııasynyń ındeksin qalyptastyrýǵa eń úlken áser etetin aımaqtardyń qatarynda birinshi tur. Odan keıin Astana men Shymkent keledi.

Almatynyń bazarlaryn turaqty baǵadaǵy ónimmen toltyrý úshin kókónisterdi tikeleı jetkizýshiler azdyq etedi. Osyǵan baılanysty Serik Jumanǵarın aýyl sharýashylyǵy mınıstrliginiń aldyna jaqyn mańdaǵy oblystardan kókónisterge kepildik beretin jetkizýshilerdi respýblıkalyq mańyzy bar úsh qalaǵa bekitý mindetin qoıdy. Áleýmettik-kásipkerlik korporatsııalar úzdiksiz jetkizý kepildigin qamtamasyz etýi tıis.

Keńes qorytyndysy boıynsha vıtse-premer ákimdikterge baǵany turaqtandyrý máseleleri boıynsha ÁKK jumysyn qatań baqylaýǵa alýdy tapsyrdy.

Atap aıtqanda, 2025 jyldyń maýsymaralyq kezeńinde qazaqstandyqtardy turaqty baǵadaǵy kókónispen qamtamasyz etý úshin 2024 jylǵy 1 tamyzǵa deıin aýyl sharýashylyǵy taýaryn óndirýshilerinen ónim satyp alýdy qarjylandyrý qajet.