Astana ákimdigi Olımpıada chempıondary men bapkerlerine qansha syıaqy beredi

<p>ASTANA. KAZINFORM &ndash; Astana qalasynyń ákimdigi Parıjdegi Olımpıada oıyndarynda chempıon atanǵan elordalyqtardy qandaı marapat kútip turǵanyn aıtty.</p>

Agenttiktiń resmı saýalyna bergen jaýabynda ákimdik halyqaralyq jarystarda joǵary sporttyq nátıjelerge qol jetkizgeni úshin sportshylarǵa Astana qalasy ákiminiń syılyǵy kózdelgenin jetkizdi: Birinshi oryn úshin jarysqa qatysýshy 750 AEK (2,7 mln teńge), ekinshi oryn úshin – 600 AEK (2,2 mln teńge) jáne úshinshi oryn úshin – 450 AEK (1,6 mln teńge) mólsherinde syılyqaqy alady.

Sondaı-aq, sportshylar men olardyń jattyqtyrýshylaryna Olımpıadada ulttyq qurama sapynda bolǵany úshin aı saıynǵy tólemder tólenedi: birinshi oryn – 250 AEK-ke deıin (923 myń teńge), ekinshi oryn – 200 AEK-ke deıin (738 myń teńge), úshinshi oryn – 150 AEK-ke deıin (553 myń teńge), tórtinshi oryn – 90 AEK-ke deıin (332 myń teńge), besinshi oryn – 70 AEK-ke deıin (258 myń teńge), altynshy – 60 AEK-ke deıin (221 myń teńge).

Ákimdik jaýabynda páterler men avtokólik berý jóninde sóz bolmaǵan. Bul rette Zań boıynsha Olımpıada, Paralımpıada jáne Sýrdlımpıada oıyndarynyń chempıondary men júldegerlerine kommýnaldyq turǵyn úı qorynan óteýsiz negizde turǵyn úı beriledi: altyn medal ıegeri úshin – úsh bólmeli páter, kúmis – eki bólmeli jáne qola úshin – bir bólmeli turǵyn úı. Medaldar sanyna qaramastan, baspana tek bir ret beriledi.

Aıta keteıik, Parıj Olımpıadasyna Astana qalasynan 12 sportshy 7 sport túrinen 13 lıtsenzııa jeńip alǵan. Onyń ishinde tennıs, boks, júzý, bessaıys, ústel tennısi, sporttyq órmeleý bar.