Astana ákimi tyshqan qaptap jatqany týraly turǵyndardyń shaǵymyna jaýap berdi

<p>ASTANA. KAZINFORM &ndash; BAQ ókilderi elorda ákimi Jeńis Qasymbekke turǵyndardyń tyshqandar qaptap jatqany týraly muńyn jetkizdi.</p>

«Tyshqandar, egeýquıryqtar tek kóktem men jazda qaptap ketedi degen máselege kelsek, biz bul baǵytta belsendi jumys istep jatyrmyz. Erte kóktemde bastaımyz, jumys jyl boıy jalǵasady. Bıyl ótken jyldarǵa qaraǵanda kóp nemese óte kóp boldy dep oılamaımyz. Sonymen qatar áleýmettik jeliler men BAQ-taǵy jarııalanymdardy kórip otyrmyz», - dep jaýap berdi Jeńis Qasymbek «Baıqońyr» aýdany turǵyndarymen kezdesý barysynda.

Sondaı-aq, qala basshysy jándiktermen kúreske bólinetin qarjy kóleminiń azaımaıtynyn aıtty.

«Qala ósip, turǵyn úı keshenderiniń sany artyp kele jatqanyn eskersek, bólinetin soma ulǵaıady. Qansha soma ekenin dál qazir aıta almaımyn, keıin jetkizemin», - dep tolyqtyrdy ol.

Buǵan deıin Jeńis Qasymbek Astanadaǵy «Qazaqstan» sport saraıynyń qurylysynyń aıaqtaý merzimin atady. 

Aıta ketsek, kesheden beri elordada qatty jel soǵyp, qolaısyz aýa raıy qala turǵyndaryn ábigerge salyp jatyr. 

Buǵan deıin jazǵanymyzdaı, Ertis-Baıan óńirindegi eldi mekenderde úı tyshqandarynyń qaptap ketýi bıologııalyq turǵydan alǵanda qalypty qubylys. Bıyl jerdiń ylǵaldy bolýyna baılanysty qorek kóbeıip, sonyń áserinen tyshqandardyń kóbeıý úderisi júrýi yqtımal.