Astana ákimi Táýelsizdik dańǵylyndaǵy kópirdiń qashan ashylatynyn aıtty

<p>Astana qalasynyń ákimi Jeńis Qasymbek&nbsp;<a href="https://www.instagram.com/p/CyI545HMu-4/?igshid=MzRlODBiNWFlZA==" target="_blank" rel="noopener">Instagram</a>&nbsp;paraqshasynda Táýelsizdik dańǵylyndaǵy kópirdiń qurylys barysymen tanysqanyn málim etti, dep habarlaıdy elorda ákimdiginiń resmı saıty.</p>

«Táýelsizdik dańǵylynyń boıyndaǵy kópirdiń qurylys barysymen tanystym. Osy aıdyń sońynda kópir ústindegi qozǵalysty ashýdy josparlap otyrmyz.
Avtokólik kópiri – tórt jolaqty. Kógaldandyrý jumysy kóktemde aıaqtalady.

Bul kópir joldardaǵy keptelisti edáýir jeńildetýge múmkindik beredi: sol jaǵalaýdy Táýelsizdik dańǵylymen, jańa temirjol vokzalymen, Qoshqarbaev dańǵylymen, Nájimedenov kóshesimen, Áziret Sultan meshitimen, Baıtursynov, Qordaı, Aınakól kóshelerimen, Momyshuly dańǵylymen jáne t.b. qosymsha baılanysty qamtamasyz etedi.

Sol sııaqty keler jyly Kenesary kóshesiniń boıynda (QazGıÝÝ ýnıversıteti aýdanynda) Esil ózeni arqyly ótetin taǵy bir kópirdiń qurylysyn bastaımyz. Qazir jobalaý jumysy júrip jatyr.

Sonymen qatar kelesi jyly Táýelsizdik dańǵylynyń Qabanbaı batyr dańǵylyna deıingi jalǵasyn salýǵa kirisemiz. Bul qalanyń jańa bóligindegi Máńgilik el, Qabanbaı batyr dańǵyldarynda, Túrkistan, Kereı-Jánibek handar jáne Aıtmatov kóshelerinde kólik aǵynyn seıiltedi.

Ótken jyly Uly Dala dańǵylynyń boıyndaǵy jańa kópir men A62 kóshesiniń boıynda (A91 kóshesinen Astana-Qaraǵandy tas jolyna deıingi ýchaskede) kólik qozǵalysy ashylǵan bolatyn. Bul da birneshe kóshedegi kólik qozǵalysyn seıiltti», – dep jazdy Jeńis Qasymbek.