Astana ákiminiń atynan úzdik mádenıet qyzmetkerleri marapattaldy (FOTO)

ASTANA. QazAqparat - 21 mamyrda elordada mádenıet jáne óner qyzmetkerleri kúni aıasynda «Qazaqstan» ortalyq kontsert zalynda qala basshysy Ádilbek Jaqsybekovtyń atynan úzdik qyzmetkerlerge Alǵys hattar tapsyrý rásimi jáne merekelik kontsert ótti, dep habarlaıdy Astana qalasynyń Mádenıet basqarmasynan.

Ákim atynan Alǵys hattardy Mádenıet basqarmasynyń basshysy B.Majaǵulov tabys etti.

- Bul kún shyǵarmashylyq mamandyq ıelerin, mádenıet qaıratkerlerin biriktiredi. Mádenıet salasynyń damýy urpaqtar men halyqtar arasyndaǵy baılanysty nyǵaıtyp, jas urpaqty óz Otanyn súıýge tárbıeleıdi. Barlyq mádenıet qyzmetkerlerine tabandy eńbekteri úshin alǵys aıtamyn, - dedi Bolat Majaǵulov.

Sonymen qatar merekelik shara barysynda «Qazaqstan halqy Assambleıasyna 20 jyl» Qazaqstan Respýblıkasynyń memlekettik mereıtoılyq medaldary tabystaldy.

Mádenıet qyzmetkeri kúnine arnalǵan merekelik kontsertte Búrkit, «Jigitter» toby, Kúlııam Qaıyrbaeva jáne «Lashyn» toby syndy óner juldyzdary án shyrqady.

Aıta keteıik, jyl saıyn mamyrdyń 21 kúni elimizde Mádenıet jáne óner qyzmetkerleri kúni atalyp ótedi. Bul mereke 2013 jyly Qazaqstan Respýblıkasynyń Prezıdenti N.Á.Nazarbaevtyń Jarlyǵymen bekitilgen.