Astana ákimi Jeńistiń 70 jyldyǵyna oraı ardagerler men tyl eńbekkerlerin memlekettik nagradalarmen marapattady
Bul týraly Astana qalasy ákimdiginiń baspasóz qyzmetinen habarlady.
Memleket basshysy Nursultan Nazarbaevtyń Jarlyǵymen Astana qalasynyń ákimi Ádilbek Jaqsybekov memleket aldyndaǵy eren eńbegi, belsendi qoǵamdyq qyzmeti úshin jáne Uly Otan soǵysyndaǵy Jeńistiń 70 jyldyǵynyń qurmetine soǵys ardageri Shaǵıla Qusaıynovaǵa «Parasat» ordenin, soǵys ardagerleri Tezekpaı Ábdirahmanovqa, Qadan Bekenovke, Vladımır Kalsınge, Marııa Poltoratskaıaǵa, «Ardagerler uıymy» RQB Astana qalasyndaǵy bólimshesiniń tóraǵasy Amangeldi Syzdyqovqa «Qurmet» ordenin tapsyrdy. Soǵys ardagerleri Baımuhan Ábilov, Baqtybaı Almabekov, Aleksandr Morýnov Shárip Rahymjarov, eńbek ardageri Qalı Muqataev, «Ardagerler uıymy» RQB Astana qalasyndaǵy bólimshesi tóraǵasynyń orynbasary Esbolat Dúısenov «Eren eńbegi úshin» medaldarymen marapattaldy.
«Sizderdi kele jatqan ataýly mereıtoı - Uly Jeńistiń 70 jyldyǵymen quttyqtaımyn. Jeńis kúni - biz erekshe tolqynyspen qarsy alatyn merekelerdiń biri. Bul mereke bizdi biriktirip ǵana qoımaı, sizderge - jeńimpaz býynǵa elikteýge shaqyrady», - dedi ákim.
Sonymen qatar, soǵys ardagerleri Sıhymbaı Mamyrov pen Janııaz Shalbolovqa Qazaqstan Respýblıkasynyń qurmet gramotalary tabystaldy.
«Sizderdiń ómirlerińiz - eren erlikke, qaharmandylyqqa jáne tabandylyqqa toly. Soǵystyń aýyr zardabyn arqalap óttińizder. Soǵys jyldarynan keıin memleketti jandandyrýǵa qatystyńyzdar. Sizderdiń erlikterińiz biz úshin uly úlgi bolyp qalady. Sizderge densaýlyq pen bar jaqsylyqty, otbasylaryńyzǵa baqyt tileımin!» - dedi Ádilbek Jaqsybekov.