Astana ákimi uıaly telefonnan bas kótermeıtin kólik júrgizýshilerine narazy

ASTANA. QazAqparat - Búgin Astana qalasynyń kóliktik keshenin damytý baǵdarlamasyna arnalǵan qoǵamdyq tyńdaýlar barysynda Astana qalasynyń ákimi uıaly telefonnan bas kótermeıtin avtobýs júrgizýshilerine óz narazylyǵyn bildirdi, dep xabarlaıdy QazAqparat tilshisi.

"Myna bir derekterdi qarańyzshy, 1191 ret júrgizýshiler kólikti basqarý kezinde uıaly telefondy paıdalanǵan. Dál osy tártip buzýshylyqtarǵa xalyq ta narazy. Masqara ǵoı! Olar uıaly telefonǵa qarap, jolaýshylardyń ómirine qaýip tóndirip júredi. Bul taza zańdy buzý ǵoı. Jeke kóliktiń ózinde uıaly telefondy paıdalaýǵa bolmaıdy ǵoı. Al bizdiń avtobýs júrgizýshilerimiz bylq etpeı, uıaly telefonnan bastaryn kótermeı júredi. Rýlde otyryp, temeki shegedi. Biz 18-shi ǵasyrda turyp jatqan joqpyz ǵoı. Sosyn kabınaǵa bóten adamdardy kirgizip alady. Onymen qoımaı qaýipsizdik beldikterin taqpaıdy", - deıdi Isekeshev. Onyń aıtýynsha, jańa aqparattyq júıe arqyly ondaı tártip buzýshylyqtardyń barlyǵy anyqtalyp, erejeni saqtamaıtyn kólik júrgizýshileri jumystan shyǵarylady.

Aıta keteıik , shara barysynda Astana qalalyq jolaýshylar kóligi basqarmasynyń basshysy Bekmyrza Igenberdıev aǵymdaǵy jyldyń ekinshi toqsanynda taǵy eki kóshede birjaqty qozǵalystyń engiziletinin málimdedi.