Astana ákimi Úlken jáne Kishi Taldykól taǵdyry týraly aıtty

ASTANA. QazAqparat – Úlken Taldykóldiń kólemi 5 ese ulǵaıady, al Kishi Taldykól mańyna úı salýǵa ruqsat berilmeıdi. Bul týraly Astana qalasynyń ákimi Jeńis Qasymbek aıtty, dep habarlaıdy QazAqparat tilshisi.

«1990-shy jyldary Úlken Taldykólde 50 mln tekshe metr sý bolatyn. 2000-shy jyldary 10 mln boldy. Al qazir 1 mln tekshe metrden az.

2015 jyldan bastap káriz arqyly Taldykólge baratyn sýdy tazartyp, ony Esil ózenine jibergenbiz. Endi mınıstrlikpen kelisip, ol sýdy Úlken Taldykólge baǵyttaıtyn boldyq. 2 apta boldy sýdy sol jaqqa jiberip jatyrmyz. Úlken Taldykóldiń kólemin 5 ese kóbeıtemiz», - dedi Jeńis Qasymbek búgin Ortalyq kommýnıkatsııalar ortalyǵynda ótken brıfıngide.

Onyń sózinshe, Úlken Taldykóldiń kólemin ulǵaıtýǵa 1,5-2 jyl ýaqyt ketedi.

«Al Kishi Taldykólge kelsek, onda birneshe kishi ózen bolatyn. 9,3,7-shi ýchaskeler boıynsha qazir jumystardy atqaramyz jáne olardy saqtap qalamyz. Saıabaq salynýy tıis ýchaske – 5-shi. Onyń jobasy qazir ázir emes, áli daıyndalyp jatyr. Bul máseleni qalanyń turǵyndarymen aqyldasý kerek. Biraq ol jerde jańa qurylys bolmaıdy. Buǵan deıin salynyp qoıǵan úılerde adamdar turady, buǵan eshteńe isteı almaımyz», - dep málim etti Jeńis Qasymbek.