Astana ákimi «saqaldy qurylysqa» aınalǵan Sıtı palas kesheniniń ıesin tabýǵa ýáde berdi

ASTANA. QazAqparat – Astana ákimi Jeńis Qasymbek Baıqońyr aýdanynyń turǵyndarymen kezdesýinde «saqaldy qurylysqa» aınalǵan «Sıtı palas» saýda-oıyn-saýyq kesheniniń ıesin tabýǵa ýáde berdi, dep habarlaıdy QazAqparat tilshisi.

Kezdesý barysynda BAQ ókili atalmysh nysannyń talaı jyldan berý qańyrap turǵanyn aıta kelip, endigi taǵdyry ne bolatynyn surady.

«Nysannyń ıesin tabýǵa tyrysamyn. Olaı bolmaǵan jaǵdaıda ıesi nysandy satatyndaı nemese qurylysty aıaqtaıtyndaı shara qabyldaımyz», – dedi Jeńis Qasymbek.

Atalmysh kezdesýde Astana ákimi qala turǵyndaryna satylyp jatqan kómirdiń sapasyn tekserý týraly tapsyrma berdi.

«Shubarkól kómiri eksportqa jiberilmeıdi. Al sizder jaǵyp otyrǵan kómir sapasyna kelsek, tekseremiz. Turǵyndar kómir satyp alyp júrgen ýchaskeni baryp tekserińizder. Ondaǵy kómir talapqa saı ma, joq pa, anyqtaý kerek», - dedi ol.