Astana ákimi kómir satatyn oryndardy aralady

ASTANA. QazAqparat - Búgin Astana ákimi Baqyt Sultanov elordada kómirdiń bar-joqtyǵyn tekserip, revızııa jasady, dep habarlaıdy QazAqparat qala ákiminiń baspasóz qyzmetine silteme jasap.

Ákim qatty otyndy satatyn negizgi núktelerge baryp, kún saıyn túsetin kómir týraly esepti tyńdady jáne halyq arasynda aıqaı-shýǵa jol bermes úshin naqty tapsyrmalar berdi. Ol eń aldymen Jubanov kóshesi, 35 mekenjaıyndaǵy saýda alańynda boldy. Kómir satýshylar munda kún saıyn Shubarkólden 10 vagon kómir jáne 5 vagon Maıkóbe markaly kómir kelip túsetinin aıtty. Suranys kóbine tańerteńnen túske deıin qyza túsedi. Al keshkisin kómir jetkilikti bolsa da, satyp alýshylar kelmeıdi eken. Onyń ishinde shubarkóldik kómirge suranys joǵary. 

Al Kóktal, 28/1 mekenjaıyndaǵylar ákimge munda kún saıyn Shubarkólden 10 vagon kómir keletinin, onyń 5 vagony - Maıkóbe, 5 vagony - Qarajyra kómiri ekenin túsindirdi. Kúnine 200 KamAZ kómir satylady. Kómir tıeý tańǵy saǵat 7-den bastalyp, keshki 17.00-ge deıin jalǵasady. Bir kólikke shamamen 10 mınýt ýaqyt ketedi. Sonyń ózinde keıbir iri júk kólik júrgizýshileri kezek saqtamaıtyndyqtan, shý shyǵyp jatady eken.

«Eger bári tártip saqtasa, kezek tez jyljıdy. Biraq keı júrgizýshiler alǵa kezeksiz shyqqysy kelgendikten keptelis týyndaıdy. Tipti tóbeleske deıin barady. Saǵat 17.00-de júk tıeý aıaqtalady. Sol sebepti kim úlgere almaı qalady, erteńge qalady. Taǵy biri mysal, alypsatarlar jaqyn mańdaǵy halyqqa kómirdi qaıta satý úshin kún saıyn osynda turady», - dedi júk kóliginiń ıesi. 

Kómir satýshylar klıentter aıqaı-shý shyǵarmaı tynysh tursa, barlyǵyn óz ýaqytymen jiberetinin aıtýda. Kómir barlyǵyna jetedi, ol jaǵynan problema joq», - deıdi olar.

Aıta keteıik, kómirdiń jalpy qory 19 qyrkúıektegi jaǵdaı boıynsha - 7951 tonna. Budan bólek, Astanaǵa 7-18 qyrkúıek aralyǵynda 197 vagon nemese 13 50 tonna kómir kelip tústi.

Onyń:

- 76 vagony nemese 5266 tonnasy - Shubarkól kómiri (tonnasy 13500 - 14500 tg);

- 32 vagon nemese 1804 tonnasy - Qarajyra kómiri (tonnasy 14 000 tg);

- 5 vagon nemese 346 tonnasy - Bogatyr kómiri (tonnasy 8500 - 9500 tg);

- 67 vagon nemese 4 649 tonnasy - Maıkóbe kómiri (tonnasy 12000 - 12500 tg). 

Burynyraq habarlaǵanymyzdaı, Astana otyn-energetıkalyq kesheni jáne kommýnaldyq sharýashylyq basqarmasy kómir óndirýshilermen baǵany ósirýge jol bermeý týraly memorandýmǵa qol qoıǵan bolatyn. Naryqtaǵy ahýalǵa astana ákimdigi kún saıyn monıtorıng júrgizýde. Qatty otyndy satatyn oryndar men baǵasy týraly aqparatty táýlik boıy 109 nomerine habarlasyp bilýge bolady.