Astana ákimi depýtattar saılaýynda daýys berdi

ASTANA. QazAqparat – Astana qalasynyń ákimi Jeńis Qasymbek Májilis pen máslıhattar saılaýyna №59 saılaý ýchaskesine kelip daýys berdi, dep habarlaıdy QazAqparat tilshisi.

«Jalǵyz aıta alatynym, Astana boıynsha saılaý belsendi ótip jatyr. Kadıdattar óte kóp. 17 birmandatty okrýg boıynsha 150-den astam kandıdat bar. Májilistiń 2 okrýgi boıynsha shamamen 70-ten astam kandıdat bar. Bul shynymen de úlken báseke júrip jatqanyn kórsetedi», - dedi qala ákimi.

BAQ ókilderi Jeńis Qasymbekten bıýlletenderdegi «Bárine qarsymyn» degen baǵandy qalaı paıdalanǵany jóninde surady.

«Eshbir bıýlletende ol baǵandy belgilegen joqpyn», - dedi ákim.

Bul saılaý ýchaskesinde 2861 saılaýshy tizimge engizilgen.

«Daýys berýshilerge arnap 2881 bıýlleten daıyndalǵan. Týra tańǵy saǵat 7.00-de bastap kettik. Jartys saǵattyń ishinde 100-deı adam daýys berdi», - dedi №59 saılaý ýchaskesiniń tóraǵasy Amangeldi Myrzabaev.