Astana ákimdigi jaýapsyz merdigerlermen kelisimshartty buzdy
Astana ákimdigi jol qurylysyna baılanysty jaýapsyz merdigerlerdiń máselesin sheshti. Esterińizge sala keteıik, mamyr aıynda Áset Isekeshev avtomobıl joldarynyń qurylysyn aralap shyǵyp, tekserý barysynda ókiletti organdarǵa óz mindetin atqarmaǵan jaǵdaıda merdigerlermen kelisimshartty buzýdy tapsyrǵan bolatyn.
Sonymen, mamandandyrylǵan aýdanaralyq ekonomıkalyq sotqa kóshe qurylysy boıynsha memlekettik satyp alýǵa qatysqan merdigerlerdi josyqsyz dep taný týraly jáne kelisimshartty buzý úshin bes talap-aryz berildi. Onyń ishinde úsh mekememen kelisimshartty buzý týraly sheshim qabyldandy.
Olar: «DM Infrastructure» JShS (Á. Jangeldın kóshesiniń Kúmisbekov pen Sh. Beısekova kósheleri aralyǵynda merdigerlik qurylys jumystaryn júrgizgen), «SCC Company» JShS (E10, E30 E15 jáne E25 ýchaskesindegi kóshe qurylysy), «Tehstroıservıs» JShS (Túrkistan kóshesinde № 23 - № 30 kósheler aralyǵynda (Kereı-Jánibek handar kóshesinnen № 27 kóshege deıingi aralyq) merdigerlik qurylys jumystaryn júrgizgen).
Merdiger uıymdardyń aldynda avtojol obektilerin salý mindeti turdy, ıaǵnı myqty transporttyq tirek qalyptastyratyn magıstraldik kóshelerdi salý talap etildi. Olar óz kezeginde áleýmettik mańyzy bar nysandardy ǵana emes, ınjenerlik jeliler men kire beristerdi de qamtamasyz etip, transport júktemesin alyp tastaýda úlken ról atqarýy kerek bolatyn.
Bıyl Astanada uzaqtyǵy 20,8 km 22 jańa kósheniń qurylysy men uzaqtyǵy 61,15 km 91 kósheni jóndeýden ótkizý josparlanyp otyr.
Aıta keteıik, qazirgi tańda ókiletti organdar avtojol obektileriniń qurylysy boıynsha óz mindetin jetkilikti atqarmaǵan jaýapsyz uıymdardy anyqtaý jáne tekserý jumystaryn jalǵastyrýda. Kelisimshart boıynsha óz mindetin atqarmaǵan faktisi rastalsa, ol kompanııalar josyqsyz jetkizýshiler tizimine engiziledi.