Astana ákimdigi suranysqa ıe mamandyqtardy atady
Astanada qalalyq Jumyspen qamtý ortalyǵynyń úsh ókildigi ashyldy. Onda jumys izdeýshiler ózekti bos oryndarmen tanysyp, suhbattasýǵa joldama ala alady.
Astana qalasy ákimdiginiń jumyspen qamtý ortalyǵynyń baspasóz qyzmetiniń jetekshisi Dıdar Sadyqov málimdegendeı, eńbek naryǵynda qurylys salasynyń mamandyqtary suranysqa ıe. Alaıda, tizim júzý bapkeri jáne kınolog sııaqty sırek kezdesetin bos jumys oryndary bar, dep jazady Pm.kz.
«Astanada jumyspen qamtý ortalyǵynyń birden úsh ókildigi ashyldy, onda jumys izdeýshiler málimetter bazasyndaǵy ózekti bos oryndarmen tanysyp, suhbattasýǵa joldama ala alady. Sonymen qatar, jastar praktıkasyn, daıarlaý jáne qaıta daıarlaý kýrstaryn ótý jaǵdaılary men qajetti qujattar jıyntyǵy týraly mamandardyń keńesin alýǵa bolady», - dedi D. Sadyqov.
Baspasóz qyzmetiniń basshysy basa aıtyp ótkendeı, Jumyspen qamtý ortalyǵy ókildikteriniń qosymsha oryndaryn ashý jumyssyzdardyń basym bóligin memlekettik qoldaý sharalarymen qamtý qajettigine negizdelgen.
«Qazirgi tańda elordalyq Jumyspen qamtý ortalyǵynyń bazasynda 3 myńnan astam bos oryn bar. Biraq, biz búgin turǵyndarǵa eń ózekti jáne eń suranysqa ıe bos oryndardy usynamyz: qurylys mamandary, elektrshiler, dánekerleýshiler, úlken júk kólikteriniń júrgizýshileri, kran mashınısteri. Qala ósip keledi, EKSPO nysandary salynyp jatyr. Osyǵan deıin atalǵan ókildikterge júgingen 834 adamnyń jyl basynan beri 355 adam jumysqa ornalastyryldy, 72 adam jastar praktıkasyna, 44 adam mamandardy daıarlaý jáne qaıta daıarlaý kýrstaryna jiberildi», - dep basa aıtty D. Sadyqov.