Astana ákimdigi shyǵarmashylyq úıirmelerge qosymsha 6 mlrd teńge surap otyr

NUR-SULTAN. QazAqparat – Nur-Sultan qalasynda shyǵarmashylyq úıirme usynýshy uıym jumystan shyǵyp ketken mamannyń derekterin paıdalanyp kelgen, dep habarlaıdy QazAqparat tilshisi.

Bul týraly Nur-Sultan qalasy mádenıet basqarmasynyń basshysy Sanat Shapashov qalalyq máslıhattyń turaqty komıssııa otyrysynda aıtty.

«Qala ákimdigi memlekettik sporttyq-shyǵarmashylyq tapsyrystardyń oryndalýyn uıymdastyrady. 2021 jyly ákimdik memlekettik shyǵarmashylyq tapsyrysty oryndaýǵa 613,6 mln teńge bólip, 10 390 bala qamtyldy. Búgingi tańda astanada 537 shyǵarmashylyq mektep 45 baǵyt boıynsha jumys istep tur. Berilgen vaýcherdiń jalpy sany – 40 325. Bir bala sport, shyǵarmashylyq jáne qosymsha bilim úıirmesiniń ishinen eki vaýcher tańdaı alady», - dedi Sanat Shapashov.

Aıtýynsha, qazirgi tańda mádenıet basqarmasynyń aldynda sheshimin tappaǵan birqatar másele bar.

«Onyń ishinde vaýcher úılestiretin elektrondy portaldyń jumysynyń kemshiligi de bar. 2022 jylǵa 2 mlrd teńge bólgen kezde elektrondy portaldyń ázirleýshisine bıýdjet múmkindikterine oraı 20 myń vaýcher ǵana berý josparlanyp otyrǵany jazbasha habarlanǵan bolatyn. Biraq ázirleýshi 40 myń vaýcher berilgennen keıin ǵana ótinim qabyldaýdy toqtatty. ıAǵnı, osy 40 myń balany úıirmemen qamtý úshin jyl aıaǵyna deıin 6 mlrd teńgedeı aqsha kerek dep topshylap otyrmyz. Oǵan qosa portaldyń jumysyna qatysty problema týyndap tur. Vaýcherlerge bólingen qarajattyń ıgerilýin baqylaý múmkin emes. Birinshiden, kelisimshart bolmaǵandyqtan aqparattyq qaýipsizdik máselesi bar. Ekinshiden, úıirmege qatysýshy «óli jandarǵa» aqsha tóleý qateri bar. Buǵan deıin ózge óńirlerde osyndaı másele týyndaǵan bolatyn. Úshinshiden, úıirmelerge biliktiligi tómen mamandardyń tartylý qaýpi bar. Mysaly, Adaq esimdi azamatshadan úıirme usynýshy uıymnan ketip qalǵanyna qaramastan jeke derekteriniń áli portalda júrgeni týraly shaǵym tústi. Tórtinshiden, eletrondyq tsıfrlyq qoltańbasy jdoq qujattar boıynsha aqsha tóleý tájirıbesi bar», - dedi basqarma basshysy.

Aıta keteıik, astana ákimdigi sport úıirmelerine 1 mlrd teńge qaryz.