Astana ákimdigi myńnan astam úıdiń gaz qubyryn tekseredi
«Elorda ákimdigi kommýnaldyq-turmystyq tutynýshylardyń ishki gazben qamtý júıelerin tekserýdi bastady. Búginde Astanada ortalyqtandyrylǵan gazben qamtý jumystary 1400 rezervýar arqyly júzege asýda. 1080 kóppáterli úıde 80 myńnan astam páter gaz tutynady. Bir aıda sarapshylar uıymy men Astananyń táýelsiz gaz mamandary qaýymdastyǵyn tartyp, barlyq gaz berý oryndary tekseriledi», - dedi Maqsat Abylov.
Onyń aıtýynsha, tekserý jumystarynan keıin tabylǵan aqaýlardy jóndeý týraly páter ıeleri kooperatıvine nusqaý beriledi. Bul rette aqaýlardy turǵyndardyń ózi retteýi tıis, sebebi zańnamaǵa sáıkes, podezd ishindegi gaz qubyrlary ortaq paıdalanýǵa berilgen ınjenerlik júıeler bolyp sanalady.
«Ázirge ákimshilik shara qoldanbaıtyn tekserý júrgizýdemiz. Suıytylǵan gazdy qoldanýda týyndaıtyn tótenshe jaǵdaıdyń aldyn alý boıynsha túsindirý jumystary júrgiziledi. Qańtar aıynda eń aldymen podezd ishindegi gaz qubyrlary tekseriledi. Keıinirek rezervýarlyq qondyrǵylar - 1400 jerasty rezervýaryn qamtıtyn 340 gazgolder nazarǵa alynady», - dedi ol.
Aıta keteıik, búgin Astana ákimi Baqyt Sultanov TJ departamentine qaladaǵy barlyq gaz toltyrý stantsııalaryn tekserýdi tapsyrdy.
Eske sala ketsek, 2 qańtarda keshke Aqjol kóshesi, 26 meken-jaıy boıynsha ornalasqan jeke gaz toltyrý stantsııasy aýmaǵynda syıymdylyǵy 5 tekshe metrdi quraıtyn tsısterna órtengen bolatyn. Osynyń saldarynan stantsııa mańyndaǵy qoımanyń shatyry búlinip, jataqhana terezeleri synǵan. Sonymen birge, 26 jeltoqsanda qaladaǵy turǵyn úılerdiń birinde gazgolder janǵan bolatyn.
«Áriptester, 31 jeltoqsanda Magnıtogorsk qalasynda 10 qabatty turǵyn úıde gaz ballony jarylǵanyn bilesizder. Adamdar qaıtys boldy. Osyndaı jaǵdaıdyń aldyn alý maqsatynda TJD-ne, ındýstrııalyq damý jáne ónerkásiptik qaýipsizdik komıteti departamentine atalǵan jaǵdaılarǵa baılanysty tekseris júrgizip, qaladaǵy barlyq gaz quıý stantsııalaryn tekserýdi tapsyramyn. Onyń nátıjesi boıynsha maǵan esep beretin bolasyzdar»,- dedi Baqyt Sultanov.