Astana ákimdigi kómir alýǵa jaǵdaıy joq halyqqa 19 240 teńgeden kómek beredi

ASTANA. QazAqparat - Astana qalasynyń jumyspen qamtý, eńbek jáne áleýmettik qorǵaý basqarmasy kimderdiń qatty otyndy satyp alýǵa memleketten kómek ala alatynyn málim etti, dep habarlaıdy QazAqparat qala ákiminiń resmı saıtyna silteme jasap.

Basqarmanyń málimetinshe, áleýmettik kómek jan basyna shaqqandaǵy tabysy eń tómen kúnkóris deńgeıinen aspaıtyn, basqa turǵyn úıi joq, peshpen jylytatyn jeke turǵyn úıde turatyn, onyń jeke menshik ıesi (jalǵa alýshysy) nemese jeke menshik ıesiniń otbasy múshesi (jalǵa alýshysy) bolyp tabylatyn, jasy boıynsha zeınetker, múgedek jáne múgedek balalarǵa beriledi. Ótemaqy 8 aılyq eseptik kórsetkish kóleminde tólenedi (19 240 teńge).

Ótemaqy alýǵa quqyǵy bar birneshe adam bir jekemenshik turǵyn úıde turǵan jaǵdaıda, ótemaqy tek qana bireýine beriledi. Áleýmettik kómek alý úshin ótinish berýshi jylytý maýsymy kezeńinde (15 qazannan bastap 30 sáýirge deıin) Astana qalasynyń Jumyspen qamtý, eńbek jáne áleýmettik qorǵaý basqarmasyna júginýi kerek. Basqarma mekenjaıy: Dostyq kóshesi, 13 «Nursaıa»-2 JK, telefon 55-68-22, 55-68-45, 55-68-34.

Ótinishke qosa tómendegi qujattardy usynady:

1) jeke basyn kýálandyratyn qujattyń kóshirmesi;

2) mekenjaı anyqtamasy;

3) osy Qaǵıdaǵa 3-qosymshaǵa sáıkes adamnyń (otbasynyń) quramy týraly málimetter;

4) Jıyntyq tabysyn esepteý qaǵıdasyna sáıkes adamnyń (otbasy músheleriniń) tabysy týraly málimetter;

5) zeınetkerlik kýáliginiń kóshirmesi - zeınetkerler úshin, múgedektigi jónindegi anyqtamasynyń kóshirmesi - múgedekter úshin;

6) Qazaqstan Respýblıkasy Ádilet mınıstrliginiń aýmaqtyq organy bergen jyljymaıtyn múlikke tirkelgen quqyǵynyń bolmaýy (bolýy) jónindegi anyqtama.

7) banktik shot týraly málimet.

Qujattardyń túpnusqalary jáne kóshirmeleri salystyrý úshin usynylady, odan keıin túpnusqalary ótinish berýshige qaıtarylady.