Astana ákimdigi kólik keshenin damytýdyń bes jyldyq josparyn usyndy
Astana qalasy máslıhatynyń kezekti sessııasynda qala ákiminiń birinshi orynbasary Sergeı Horoshýn elordanyń kólik keshenin damytý baǵdarlamasyn usyndy. Ondaǵy josparǵa sáıkes, aldaǵy 5 jylda 121 shaqyrym jol, 3 kópir, 2 kólik aıryǵy, 1 jol ótpesi jáne 1 tonnel salý josparlanýda.
«Baǵdarlamada qalanyń jańa aýdandarynda jáne eski bóliginde kóshe salý jáne qaıta jańartý jumystary kózdelgen. Mysaly, Kenesary kóshesin 2 kópiri bar Kúmisbekov kóshesinen Beısekova kóshesine deıin tesý Saryarqa jáne Bógenbaı batyr dańǵyldary jáne Seıfýllın kóshesindegi júktemeni edáýir tómendetedi. Al Asan qaıǵy kóshesiniń Táshenov kóshesinen Bógenbaı batyr dańǵylyna deıin jóndelýi Ýálıhanov kóshesinen 40% jáne Respýblıka dańǵylynan 25% paıyz júktemeni azaıtýǵa múmkindik beredi. Óz kezeginde, Táýelsizdik jáne Uly Dala dańǵyldaryn Esil ózeni arqyly ótetin kópir qurylysymen qosý Máńgilik El jáne Qabanbaı batyr dańǵyldaryndaǵy kólik júktemesin edáýir jeńildetedi», - dedi ol.
Sondaı-aq, S. Horoshýn jyl sońyna deıin 28 shaqyrym jańa jol qurylysy aıaqtalyp, taǵy 7 shaqyrym jolǵa jóndeý jumystary júrgiziledi dep málimdedi.
«Úsh jyl ishinde qala ákimdigi jol salý jáne qaıta jańartý jumystaryn júrgizdi. 110 shaqyrym jańa jol salyndy, onyń 65 shaqyrymy Ońtústik-Shyǵys, Ilınka, Komsomol jáne basqa da turǵyn alaptarynda salyndy», - dep Sergeı Horoshýn atqarylǵan jumystar týraly esep berdi.
Elorda ákiminiń orynbasary 2020 jyly Tilendıev dańǵylynan Qabanbaı batyr dańǵylyna deıin uzyndyǵy 34,4 km úlken aınalma joldyń ońtústik-batys bóliginiń aıaqtalatyndyǵyn eske saldy. Ol Astananyń kólik júıesiniń júktemeni tómendetip, qalanyń kólik aǵynynyń quramynda tranzıttik avtokólik sanyn azaıtýdy qamtamasyz etedi.
Qalanyń kóshe-jol jelileri:
Jalpy uzyndyǵy 1102 shaqyrymdy quraıtyn 1039 kóshe (asfaltbetondy jabyny 837,82 (76%), qatty jabynsyz - 264,5 km (24 %);
onyń ishinde:
- 8 kólik aıryǵy;
- 17 avtojol kópiri;
- 7 jer asty jáne 4 jer ústi jaıaý júrginshiler ótkeli;
- 9 jol ótpesi;
- 1 tonnel.