Astana ákimdigi qalamgerlerdi marapattady
Qalamgerler alleıasynda elorda ákimdigi men «Qazaqstan Jazýshylar odaǵy» qoǵamdyq birlestigi Astana qalalyq fılıalynyń qoldaýymen «Astana – shabyt arqaýy» atty mádenı is-shara ótti.
Onyń barysynda Tólen Ábdik, Qoıshyǵara Salǵarauly, Ǵarıfolla Esim, Álibek Asqar, Serik Turǵynbekuly, Aldan Smaıyl, Altynshash Jaǵanova, Shárbaný Beısenova, Tursyn Jurtbaı jáne taǵy basqa qalamgerlerge elorda ákiminiń syıaqysy tabystaldy.
Elordada rýhanııattyń qazynasy qalamgerlerdiń aǵa býyny qalyptasqan. Búginde Astanada Qazaqstan Jazýshylar odaǵynyń 160-tan astam múshesi turady. Osydan eki jyl buryn elordalyq jas aqyn-jazýshylardyń 30-dan astam kitaby jaryqqa shyqqan bolatyn. Ol dástúr áli de jalǵasyn taba beredi. Kúni keshe araǵa 11 jyl salyp aqyn-jazýshylardyń múshaırasy ótti. Osyndaı dástúrli is-sharalarda qalamgerler tek elordanyń ǵana emes, elimizdiń rýhanııatyna, mádenıetine óz úlesin qosyp kele jatyr. Búgin ózderińizge rızashylyǵymyzdy, syı-qurmetimizdi kórseteıik dep otyrmyz. Elorda kúni qutty bolsyn!
– dedi Astana qalasy ákiminiń orynbasary Eset Baıken.
Sondaı-aq is-sharada aqyndar men jazýshylar qoltańba sessııasyn, kitaptar tusaýkeserin ótkizdi.
Bıyl – baıraq kótergen Astanamyzdyń 25 jyldyǵy. Erke Esildiń jaǵasynda elorda kórkeıip, qanat jaıyp, jalpy qazaqtyń qýanyshyna aınaldy. Aqyn-jazýshylar memleketimizdiń mańyzdy dúnıelerinde beı-jaı qarap qalmaıdy. Qalamgerler bılik pen halyq arasynda altyn kópir dánekeri bolyp júr. Astana qalasy ákimdiginiń qoldaýymen búgin-erteń aqyn-jazýshylardy mereke qarsańynda qurmettep, qadirleý maqsatynda 80 qalamgerge syıaqy tabystalady
, – dedi aqyn, «Qazaqstan Jazýshylar odaǵy» qoǵamdyq birlestigi Astana qalalyq fılıalynyń dırektory Dáýletkereı Kápuly.
Aıta keteıik, Astana qalasy ákimdiginiń «Ortalyqtandyrylǵan kitaphana júıesi» KMM «Astana – beıbitshilik jáne jasampazdyq mekeni» atty kitap kórmesin usyndy.