Astana ákimdigi elordalyq úkimettik emes uıymdardy 200 mıllıon teńgeden astamǵa qarjylandyrdy

ASTANA. Qazannyń 8-i. QazAqparat /Gúlmıra Álıakparova/ - Astana qalasynyń ákimdigi elordalyq úkimettik emes uıymdardy 200 mıllıon teńgeden astamǵa qarjylandyrdy. Bul týraly búgin ÚEU-nyń qalalyq forýmynda ákimdiktiń Іshki saıasat basqarmasynyń bastyǵy Bolat Tlepov málim etti.

«Úkimettik emes uıymdardy memlekettik qoldaýdyń 2009-2010 jyldarǵa arnalǵan baǵdarlamasy sheńberinde Astana ákimdigi jergilikti bıýdjetten 200 mıllıonnan astam teńge bóldi», - dep atap ótti ol.

B.Tlepovtyń keltirgen málimetterine sáıkes, búgingi kúni Astanada 300-ge jýyq ÚEU tirkelgen. Onyń ishinde naqty jumys jasaıtyndary - 180, qala ákimdigimen tyǵyz qarym-qatynasta qyzmet etetinderi - 60.

Ol sondaı-aq, ákimdik bólgen qarajatqa júzden astam joba iske asqandyǵyn atap ótti. Aıta keteıik, elordada áleýmettik mańyzy bar jobalarǵa memlekettik tapsyrys osymen 6 jyl qatarynan júzege asyrylyp keledi.