Astana ákimdigi elorda ardagerlerin Jańa jylymen quttyqtady

ASTANA. QazAqparat - Jańa jyl qarsańynda Táýelsizdik saraıynda elordalyq ardagerlermen kezdesý ótti. Astana qalasy ákiminiń orynbasary Ermek Amanshaev ardagerlerdi kele jatqan Jańa jylmen quttyqtap, zor densaýlyq pen otbasylaryna bar jaqsylyqty tiledi, dep habarlady qalalyq ákimiktiń baspasóz qyzmetinen.

- Ózderińiz biletindeı, jýyrda Qazaqstan Respýblıkasynyń Prezıdenti Qazaqstan halqyna Joldaýyn jarııalady. Memleket basshysy memlekettiń áleýmettik ekonomıkalyq turaqtylyǵyn nyǵaıtýǵa, qoǵamnyń barlyq salalaryn modernızatsııalaýǵa, jańa áleýmettik saıasat qurýǵa erekshe nazar aýdardy. Bul rette qazaqstandyqtardyń ómir súrý sapasyn, ıgiligin arttyrýǵa, halyqty áleýmettik qorǵaý sharalaryn júzege asyrý qajettiligin atap ótti, - dedi Ermek Amanshaev.

Onyń aıtýynsha, Uly Otan soǵysyna qatysqandar men múgedekterdi, olarǵa teńestirilgen tulǵalardy jáne zeınetkerlerdi qoldaý - Joldaýdyń basym mindetteriniń biri. Jyl saıyn jergilikti jáne memlekettik bıýdjetten ardagerler men zeınetkerlerdi tegin jol júrýmen, dárilik zattarmen qamtamasyz etý úshin qarjy bólinedi, sonymen qatar, sanatorııalyq-kýrorttyq em-dom qabyldaýǵa joldamalar beriledi. Bıyl Qazaqstanda Uly Jeńistiń 70 jyldyǵy atalyp ótti. Bıýdjet qarjysy esebinen 5,2 myń adamǵa (UOS ardagerleri, tyl eńbekkerleri, UOS ardagerlerine teńestirilgen basqa sanattaǵy tulǵalar) áleýmettik kómek kórsetildi. Kezdesý barysynda áleýmettik, medıtsınalyq qyzmet kórsetý, sondaı-aq, ardagerlerge, jalpy zeınetkerlerge memleket tarapynan kórsetiletin qoldaý máseleleri sóz boldy. 2016 jyldyń 1 qańtarynan bastap zeınetaqy tóleminiń mólsheri 9% ulǵaımaq. Búginde Astanada 67 myńnan astam zeınetker bar, sonyń ishinde 186-y Uly Otan soǵysyna qatysqan ján 4 myńnan astamy tyl eńbekkeri.