Astana aglomeratsııasyna Arshaly aýdanynan engen aýyldar qalaı damýda

KÓKShETAÝ. QazAqparat - Astana aglomeratsııalyq aımaǵyna Aqmola oblysynyń Arshaly aýdanynan 7 eldi meken kiredi. Osyǵan oraı, aýdanda ındýstrııaldy aımaq quryp, óndiristi ártaraptandyrý josparlanǵan. Bul týraly óńirlik kommýnıkatsııalar qymetinde ótken brıfıngte Arshaly aýdanynyń ákimi Azamat Taıjanov málim etti, dep habarlaıdy QazAqparat tilshisi.

Eske sala keteıik, 2017 jyldyń qarasha aıynda Astana qalasy men Aqmola oblysynyń ákimdikteri arasynda Astana aglomeratsııalyq aımaǵyn damytýǵa qatysty birlesken qyzmet jónindegi memorandýmǵa qol qoıylǵan bolatyn. Osy qujatta kórsetilgendeı Astana aglomeratsııalyq aımaǵyna Aqmola oblysynyń 123 eldi mekeni enip otyr. Onyń ishinde 49 eldi meken Tselınograd aýdanynan aýmaǵynda bolsa, 7-eýi Arshaly aýdanynyń úlesinde. 

Aýdan ákimi Azamat Taıjanovtyń sózinshe, Astana aglomeratsııalyq aımaǵyna engen Jibek joly, Jaltyrkól, Volgodonovka, Qostomar, Qoıgeldi aýyldary men 42-razezd jáne Babataı stansalarynda turǵyndar sany eselep artyp keledi. Arshalylyqtardyń ál-aýqatyn arttyrý baǵytynda júzege asyrylyp jatqan memlekettik baǵdarlamar men áleýmettik-ekonomıkalyq damý kórsetkishteri aýyz toltyryp aıtarlyqtaı. Aýdan ekonomıkasyna aýyl sharýashylyǵy, ónerkásip, qurylys sııaqty salalardyń qosar úlesi zor.

«Búgingi kúni aýdanda 33 kásiporyn jumys isteıdi. Onyń ishinde negizinen temirbeton ónimderi, qıyrshyq tas, qum óndiriledi. «Qazshpal» AQ men «Arkada Indastrı» JShS ótken jyly 3,7 mıllıard teńge ónimin shyǵardy. Osynyń aqasynda ótken jyly aýdanda ónerkásip pen aýyl sharýashylyǵy salasynda oń dınamıka baıqaldy. Shaǵyn jáne orta bıznes sýbektileriniń sany 2,9 ese ósti. Negizgi kapıtalǵa salynǵan ıvestıtsııa kólemi 17,8 mıllıard teńgeni qurady», - dedi aýdan ákimi óz sózinde.

Qazirgi tańda baspana máselesi qalada da, aýylda da ótkir bolyp otyrǵany belgili. Osy oraıda, aýdanda úı qurylysy salasyn damytýǵa jetkilikti kóńil bólinip keledi. Sonymen qatar, aýdanda densaýlyq saqtaý, bilim jáne mádenıet nysandaryn salý, ustaý jumystary nazarda.

Osy kúni aýdanda 27 myń turǵyn tirkelgen. Onyń basym bóligi Jibek joly, Volgodonovka, Ijevskoe, Mıhaılovka aýyldary, Arshaly kenti jáne Anar stansasynyń úlesinde. Astana aglomeratsııalyq aımaǵy sheńberinde 2020 jyldary aýdannyń halyq sany 50 myńǵa, al 2030  jyly 70,5 myń jetedi dep josparlanǵan.