Assambleıanyń aqsaqaldary qazaq xalqyna óz alǵystaryn jetkizdi

ASTANA. QazAqparat - Beıbitshilik pen kelisim saraıynda Alǵys aıtý kúnine oraı ótken saltanatty shara barysynda QR Memlekettik xatshysy Gúlshara Ábdiqalyqova merekelik dastarqanǵa tize búgip, Qazaqstan xalqy Assambleıasynyń aqsaqaldarynyń áńgimesin tyńdady, dep habarlaıdy QazAqparat tilshisi.

Merekelik shara aıasynda qazaqtyń kıiz úıi úlgisinde dekoratsııa jasalyp, qaq ortasynda dastarqan jaıyldy. Sonyń aınalasyna jaıǵasqan etnomádenı birlestikterdiń aqsaqaldary Memlekettik xatshyǵa sonaý qıyn-qystaý kezeńdegi qazaq xalqynyń qonaqjaılylyǵy men janashyrlyǵy jaıynda áńgimelep, Elbasy Nursultan Nazarbaevqa alǵys jetkizýdi surady. "Bizdiń dos-jarandarymyz alystan xabarlasyp, xal-jaǵdaıdy suraǵanda Qazaqstandaǵy ultaralyq kelisimniń saqtalǵanyna tańqalyp jatady. Biz aıtamyz, myna jaqqa kelińizder, osy jerdegi beıbitshilik pen tatýlyqty óz kózderińizben kórińizder. Sondyqtan osyndaı tatýlyqtan aıyrmasyn! Barshańyzǵa zor densaýlyq tileımiz! Aman-saý bolyńyzdar. Aspanymyz ashyq bolsyn! Dastarqanymyz osyndaı keń ári baı bola bersin! Raqmet! Qazaq xalqyna myń alǵys aıtamyz", - deıdi nemis, sheshen, káris jáne taǵy basqa aqsaqaldar. Olardyń ishinde qazaq tilin jetik biletin azamattar da bar.
 

Aıta keteıik, búgingi saltanatty shara barysynda Memlekettik xatshy Gúlshara Ábdiqalyqova QR Prezıdenti Nursultan Nazarbaevtyń Alǵys kúnine arnalǵan quttyqtaýyn jetkizdi .