Assambleıa tájirıbesi elder nazarynda
Іs-sharaǵa Qazaqstan tarapynan quramynda Assambleıadan saılanǵan Parlament depýtattary N.Nesterova men Z.Saıapova, etnomádenı birlestikterdiń basshylary Shakır Hahazov pen Shaımardan Nýrýmov, oblystyq hatshylyqtar men memlekettik organdar ókilderi bar delegatsııany Qazaqstan halqy Assambleıasy Tóraǵasynyń orynbasary - Hatshylyq meńgerýshisi E.L.Toǵjanov bastap bardy.
Dóńgelek ústel barysynda Qytaı Halyq Respýblıkasynyń Memlekettik keńesi janyndaǵy Damý zertteý ortalyǵynyń Eýropa jáne Azııanyń áleýmettik damý ınstıtýty dırektorynyń orynbasary, professor Chjao Chantsınniń sózi qatysýshylardyń nazaryn aýdardy. Halyqaralyq qatynastar, qoǵamdyq kelisim, etnosaıasat salalarynyń bilgir mamany qazaq elindegi biregeı ınstıtýt - Qazaqstan halqy Assambleıasynyń qyzmetine joǵary baǵa berdi. «QHA tájirıbesin shet elderge tarata otyryp, halyqaralyq problemalardyń sheshilýine járdemdesýge bolady», - dep oı túıindedi professor.
Ǵalymnyń sózinen onyń táýelsiz Qazaqstannyń qalyptasý, damý tarıhyn jaqsy zerttegeni birden baıqaldy. Ol bizdiń eldegi táýelsizdiktiń alǵashqy jyldaryndaǵy qıyn kezeńderdi sanamalaı otyryp, ulttyq máselede aldyn alý sharalaryn qabyldaý qajettigi bolǵanyn da atap kórsetti. Mine, osy jaǵdaıda Qazaqstan halqy Assambleıasynyń qurylýy sheshilýine sebepshi bolǵan. Atap aıtqanda, barlyq ult ókilderiniń eldiń saıası ómirine teńdeı qatysýy qamtamasyz etilýi saıası turaqtylyqqa jáne eldiń ekonomıkalyq damýyna jol ashqanyn mysalǵa keltirdi.
Sarapshy Qazaqstannyń ulttyq birlik pen qoǵamdyq kelisim ornatýdaǵy jetistikterin der kezinde Qazaqstan halqy Assambleıasy sııaqty qurylym quryp, udaıy onyń qyzmetin qoldap kele jatqan Elbasymyz Nursultan Nazarbaevtyń kóregendigimen tikeleı baılanystyrdy. Ulttyq másele kóptegen elderde ótkir máselege aınalyp, ýshyǵyp ketken kezderi de bolǵanyn aıta kelip, 130 dan astam ult ókilderi turatyn memleket úshin Assambleıanyń alar orny asa mańyzdy ekendigin atap kórsetken ol: «Bul basqa elderde óte sırek kezdesetin asa mańyzdy memlekettik býyn. Búginde QHA tabyspen jumys isteýde, ol kóńilde Qazaqstannyń bolashaǵyna degen senimdilikti ornatady» - dedi Chjao Chantsın.
QHR Memlekettik keńesi janyndaǵy Damý zertteý ortalyǵy Qytaı Qoǵamdyq ǵylymdar akademııasynan keıin 2-shi orynda turǵan jetekshi zertteý ınstıtýty bolyp tabylady. Onda jasalǵan zertteýler el ishinde ǵana emes shet elderde de suranysqa ıe asa bedeldi ǵylymı jumystar bolyp tabylady. Eldiń damýy úshin keshendi strategııalyq zertteýler júrgizip qana qoımaı, Memlekettik keńes, Qytaı kommýnıstik partııasynyń ortalyq komıteti, mınıstrlikter men vedomstvolar úshin tıisti usynymdar ázirleıtin bul Ortalyqtyń pikiri halyqaralyq qoǵamdastyqta nazarǵa alynatynyn aıta ketýimiz kerek.