Assambleıa biregeı kásibı mámilegerler ınstıtýtyn qalyptastyrýǵa kiristi - Prezıdent

NUR-SULTAN. QazAqparat – QR Prezıdenti Qasym-Jomart Toqaev Qazaqstan halqy Assambelıasyn kıkiljińderdiń aldyn alý jáne odan keıingi retteý jumystarynda qajetti deńgeıde belsendilik tanytýǵa shaqyrdy, dep habarlaıdy QazAqparat tilshisi.

«Quqyq qorǵaý qyzmeti únemi jetildirip otyrýdy qajet etedi. Óıtkeni ony etnosaralyq qatynasta qoldaný ózekti. Assambleıa músheleri tek etnomádenı salada, qaıyrymdylyq pen volonterlikte ǵana emes, adam quqyqtaryn paıdalaný, etnomedıatsııa, jastarmen jumys, kıkiljińderdiń aldyn alý, kıkiljińderden keıingi retteý jumystarynda da qajetti deńgeıde belsendilik tanytýy kerek», - dedi Qasym-Jomart Toqaev Qazaqstan halqy Assambleıasynyń HHHІ sessııasynda.

Prezıdenttiń paıymynsha, bul taqyryptar assambelıanyń búkil qoǵamdyq qurylymdarynyń únemi nazarynda bolýy qajet.

«Men ýákiletti organdarǵa tıisti sharalar qabyldaýdy tapsyramyn. Assambleıa medıatsııa bazasynda biregeı kásibı mámilegerler ınstıtýtyn qalyptastyrýǵa kiristi. Bul qoldaýǵa laıyq jumys, bul – iske degen túbegeıli jańa kózqaras», - dedi Memleket basshysy.

Aıta keteıik, Assambleıanyń aldaǵy jıyny «El birligi – jańarǵan Qazaqstannyń tiregi» kún tártibimen ótedi.