Áskerge shaqyrý, bosatý jáne keıinge qaldyrý sms-habarlama arqyly jetkiziledi – mınıstrlik

<p>ASTANA. KAZINFORM &ndash; Qorǵanys mınıstriniń orynbasary Darhan Ahmedıev otandyq ásker salasynda engizilip jatqan tsıfrlyq jobalar týraly aıtyp berdi.</p>

«Kúzgi áskerge shaqyrý boıynsha 400 myńnan astam adam mindetin óteýdi keıinge qaldyrdy. Al kóktemgi áskerge shaqyrýmen qossaq barlyǵy 700 myń adam áskerı mindetin óteý keıinge qaldyryldy. Olardyń qatarynda stýdentter, múgedek jandar, úılengen, balalary bar azamattar bar. Odan bólek, depýtattar men din qyzmetshilerdiń de áskerı mindetin óteýdi keıinge qaldyrý quqyǵy bar, biraq olardyń sany az», - dedi Darhan Ahmadıev elordada ótken Digital army day is-sharasy barysynda. 

Onyń aıtýynsha, depýtattar men din qyzmetshileri áskerı mindetin óteýdi keıinge qaldyrý protsesin eGov portaly arqyly onlaın rásimdeıdi. 

«Al áskerge shaqyrylatyn qalǵan sanattaǵy azamattarǵa bul qyzmet proaktıvti formatta qoljetimdi. Sonymen qatar endi áskerge shaqyrý sms-habarlama (1414) arqyly jiberiledi, degenmen qaǵaz túrinde áskerı shaqyrtý qoldanystan alynbaıdy, sebebi keıbir azamattardyń uıaly telefon nómiri bazada tirkelmegen. Degenmen aldaǵy ýaqytta tolyqtaı tsıfrlyq formatqa kóshirý josparlanyp otyr», - deıdi ol. 

Aıta ketsek, búgin elordada Digital army day 2024 is-sharasy ótti, ol jerde Qorǵanys mınıstrliginiń tsıfrlyq transformatsııasy tanystyryldy. 

Buǵan deıin habarlaǵanymyzdaı áskerı bólimderde beınebaqylaý kameralarynyń sany artady.