Áskerılerge arnalǵan jalǵa beriletin arnaıy baspanalar salynady

ASTANA. QazAqparat - Áskerılerge arnalǵan jalǵa beriletin arnaıy baspanalar salynady. Bul týraly búgin Májiliste «Qazaqstan Respýblıkasynyń keıbir zańnamalyq aktilerine qorǵanys jáne áskerı qyzmet máseleleri boıynsha ózgerister men tolyqtyrýlar engizý týraly» zań jobasynyń tanystyrylymy barysynda málim boldy.

Qorǵanys mınıstriniń orynbasary Talǵat Muhtarovtyń aıtýynsha, áskerıilerdi baspanamen qamtamasyz etý máselesi áli de ózekti kúıinde qalyp otyr. Osyǵan baılanysty zań jobasymen áskerılerge baspanalyq tólemder berý tártibin retteý qarastyrylady.

«Baspana tólemderi jańa baspana qunynyń ortasha naryq baǵasymen esepteledi. ıAǵnı, áskerılerge beriletin baspana tólemderi óńirler boıynsha belgilenbeýi kerek. Budan bólek, áskerı qyzmetti atqarýdan bólek áskerı qyzmeti óteý barysynda qaıtys bolǵan áskerı qyzmetshilerdiń áıelderin, otbasylaryn baspanamen qamtý máselesi de qarastyrylyp otyr. ıAǵnı, osy sanattaǵylardyń qamtylý aıasy keńeıtiledi. Osynyń arqasynda sot oryndaryna shaǵymdar sany azaıady dep oılaımyz. Áıtpese, qazirgi kúni áskerı qyzmetin óteý barysynda nemese qyzmetten tys ýaqytta qaıtys bolǵandardyń otbasy baspana alý úshin sotqa jıi shaǵymdanady», - dedi T. Muhtarov.

Bul rette mınıstr orynbasary eger áskerı qyzmetker áskerı qyzmetin óteý ýaqytynda quqyqqa qaıshy áreket etý barysynda qaıtys bolǵan bolsa, onda olardyń otbasyn baspanamen qamtý qarastyrylmaıtynyn atap ótti.
Budan bólek, mınıstrlik ókili áskerılerdi arnaıy arendalyq baspanamen qamtamasyz etý máselesi zań jobasymen qamtylyp otyrǵanyn aıtty. Onyń aıtýynsha, bundaı turǵyn úıler qurylysy otandyq qurylys kompanııalar men ınvestorlar esebinen salynatyn bolady.