Áskerılerdiń kóbi otandyq vaktsınanyń shyqqanyn kútti – Ulttyq ulan ókili

NUR-SULTAN. QazAqparat – Ulttyq ulan áskerı keńesiniń hatshysy Saverdın Imırov sarbazdar arasynda vaktsınalaýdyń alǵashqy kezeńi nege baıaý júrgenin túsindirdi, dep habarlaıdy QazAqparat tilshisi.

«Biz birinshi jartyjyldyqtyń sońyna qaraı, shildege deıin áskerı qyzmetshilerdi vaktsınalaýdy aıaqtaýdy josparlap otyrmyz. Kóptegen áskerı qyzmetshi ózimizdiń qazaqstandyq vaktsınany kútti. Sondyqtan alǵashqy kezeńde qalys qaldy. Otandyq vaktsına qazaqstandyqtarǵa egile bastady. Densaýlyq saqtaý mınıstriniń búgin úlgi bolyp ózi vaktsına qabyldaýy el ishinde oń áser týǵyzady dep senemin. Bizdiń áskerıler de otandyq vaktsına alady dep oılaımyn», - dedi Saverdın Imırov Ortalyq kommýnıkatsııalar qyzmetinde.

Buǵan deıin habarlaǵanymyzdaı, sońǵy málimet boıynsha, Ulttyq ulan sapyndaǵy 10 608 áskerı qyzmetshi koronavırýsqa qarsy reseılik vaktsınanyń birinshi komponentin, 606 adam ekinshi komponentin qabyldaǵan.

Pandemııa kezinde qyzmet babynda Ulttyq ulannyń 2 áskerı qyzmetshisi kóz jumdy.