Áskerılerdiń eńbekaqysy kezeń-kezeńmen artady

ASTANA. QazAqparat - Áskerı qyzmetkerlerdiń jalaqysy kezeń-kezeńmen artady. Búgin Májilistegi Úkimet saǵatynda QR Qorǵanys mınıstri Sáken Jasuzaqov osylaı málim etti, dep  habarlaıdy QazAqparat.

«Áskerı qyzmetkerlerdiń aqshalaı tabysy sońǵy ret 2011 jyly joǵarylaǵan edi. Osy oraıda Qorǵanys mınıstriligi ásker qataryndaǵylardyń eńbekaqysyn kezeń-kezeńmen kóterý bastamasyn jasady. Bul jaıynda Joǵarǵy Bas qolbasshyǵa baıandadym jáne qoldaýǵa ıe boldyq»,-dedi Jasuzaqov.

Osy oraıda ol áskerı qyzmetkerlerdiń jalaqysyn arttyrý máselesi boıynsha Premer-Mınıstrdiń tóraǵalyǵymen Úkimette keńes ótkenin jetkizdi.

Mınıstrdiń sózine qaraǵanda, memlekettik zeınetaqynyń qaıtarylýyn áskerı qyzmetkerler zor rızashylyqpen qabyldady. Sonymen qatar búginde Qarýly kúshter sapynda qyzmet etip júrgenderdi baspanamen qamtamasyz etýdiń jańa qadamy ázirlendi. Bul qadam áskerılerdiń turǵyn úı máselesin sheshýine múmkindik beredi.