Áskerıler Túrkistan oblysyndaǵy sý basý qaýpine qarsy sharalarǵa tartyldy
Qardyń kúrt erýi Arys qalasy men kóptegen aýyldardy jaǵalaı aǵyp jatqan Arys ózenine quıatyn Kabylsaı kanalynyń arnasynan tasýyna ákelgen. Eldi mekenderdi sý basý qaýpine baılanysty Arys qalasy ákimdiginiń, aýdandyq tótenshe jaǵdaılar bóliminiń basshylyǵy, aýyldyq okrýgterdiń ákimderi sý tasqynyna qarsy sharalar uıymdastyryp jatyr.
«Oǵan Qarýly kúshterdiń 44859 áskerı bóliminiń júz sarbazy, №7 órt sóndirý bóliminiń jeke quramy, «Jasyl Arys» KMM mamandary, jastar resýrstyq ortalyǵynyń eriktileri jumyldyryldy. Qazirgi ýaqytta aýyldyq okrýgterge jáne sý basý qaýpi bar aımaqtarǵa jiberiletin 2 myń qap qum daıyndaldy», - dep jazdy vedomstvodan.
Aımaq basshylyǵy oryn alǵan jaǵdaıdy baqylaýda ustaýda. Kezekshi beketterde ózen aǵysy men sý deńgeıin baqylaý júzege asyrylatyn bolady.