Áskerıler men arnaıy organ qyzmetkerleriniń qyzmette bolý shekti merzimi ózgeriske ushyraýy múmkin

ASTANA. QazAqparat - Búgin Senattyń Áleýmettik-mádenı damý jáne ǵylym komıtetiniń keńeıtilgen otyrysy bolyp ótti. Onda «Qazaqstan Respýblıkasynyń keıbir zańnamalyq aktilerine halyqty jumyspen qamtý máseleleri boıynsha ózgerister men tolyqtyrýlar engizý týraly» zań jobasy talqylandy.

Qujat buǵan deıin Senattyń jalpy otyrysynda birinshi oqylymda maquldanǵan bolatyn.

Zań jobasyna sáıkes, «Múgedektik boıynsha memlekettik áleýmettik járdemaqylar týraly», «Zeınetaqymen qamtamasyz etý týraly» qoldanystaǵy zańdar Bıýdjet kodeksine sáıkes keltiriledi. «Atap aıtqanda, medıtsınalyq áleýmettik mekemelerde turyp jatqan tulǵalardyń zeınetaqysy men járdemaqylary úshin memlekettik mekemelerde ýaqytsha qarajattardy aýdarýǵa arnalǵan baqylaý shottary ashylatyn bolady. Budan bólek, jasyna baılanysty tólenetin zeınetaqy mólsheri men eńbek etken jyldary boıynsha taǵaıyndalǵan zeınetaqylar jyl saıyn respýblıkalyq bıýdjet týraly zańmen belgilenedi. Bul rette Úkimettiń jyl saıynǵy zeınetaqyny kóterýge qatysty tártipti belgileý quzyreti joıylady», deıdi zań jobasy boıynsha baıandaǵan senator Vladımır Redkokashın.

Onyń aıtýynsha, zań jobasy boıynsha arnaıy organdar qyzmetkerleri úshin qyzmette bolýdyń shekti merzimin jalpy azamattyq qyzmetkerler merzimine deıin uzartý qarastyrylady. Máselen, podpolkovnık shenindegi qyzmetkerlerdiń qyzmette bolý jasy 47-den 50 jasqa deıin, al jekelegen jaǵdaılarda odan da joǵaryǵa kóteriledi. Budan bólek, arnaıy memlekettik organdardaǵy áskerı qyzmetterden bosatý, sonymen birge kelisimshart boıynsha qyzmet etetin áskerılerdiń óz erkimen jumystan ketýi máselelerine biryńǵaı tártipti aıqyndaý úshin zańnamany birizdendirý kózdeledi.

Tutastaı alǵanda, senatorlar zań jobasyn ekinshi oqylymǵa ázirleý barysynda 35 túzetý engizgen.

Qujat palatanyń aldaǵy ýaqytta ótetin jalpy otyrysyna shyǵarylatyn bolady.