Áskerıler koronavırýs indetinen qaıtys bolǵandardy eske aldy

NUR-SULTAN. QazAqparat - Áskerıler koronavırýs indetinen qaza bolǵandardy bir mınýt únsizdikpen eske aldy, dep habarlaıdy QazAqparat Qorǵanys mınıstrligine silteme jasap.

Búgin, 13 shilde - Qazaqstanda koronavırýs ınfektsııasynan qaza bolǵandardy ulttyq aza tutý kúni. Nur-Sultan qalasy ýaqyty boıynsha saǵat 12.00-de búkil elde únsizdik mınýty jarııalandy. Koronavırýs pandemııasynyń qurbany bolǵan azamattardy Qazaqstan Qarýly Kúshteriniń áskerı qyzmetshileri de eske aldy.

«Ulttyq aza tutý kúninde qorǵanys vedomstvosynyń, elimizdiń barlyq aýmaqtaryndaǵy áskerı bólimder men mekemelerdiń memlekettik týy, dástúr boıynsha saǵat 8.00-de kóteriletin Áskerı-teńiz kúshteri kemelerinde týy tómen túsirildi. Qaza bolǵandardy eske alý men qurmetteý úshin indetpen kúreske beı-jaı qaramaıtyn azamattar qaza tutý belgisin taqty» delingen habarlamada.

Qazaqstan Respýblıkasynyń Qarýly kúshteri pandemııanyń alǵashqy kúninen bastap otandastarymyzǵa indetti jáne onyń saldaryn joıýdaǵy kúreste belsendi kómek kórsetip keledi.