Áskerı ushaqty súıregen almatylyq rekord ornatty

ALMATY. QazAqparat – «Qazaq tıtan» laqap atymen tanymal almatylyq Almat Jumanov 24,5 tonnalyq áskerı ushaqty súırep, Qazaqstannyń rekordtar kitabyna endi, dep habarlaıdy QazAqparat tilshisi.

Qazaqstan rekordtar kitaby tirkeý departamentiniń dırektory Baqytjan Tastúlekov Almat Jumanovtyń nátıjesin resmı túrde tirkep, esepke alyp, sertıfıkatyn tabys etti.

«Búgin Almat kezekti rekordyn jasady. Budan buryn Naýryz meıramynda osy ushaqty 6 metrge tartqan eken. Sony qaıtalaımyn dep, bizdi shaqyryp edi. Biraq, 6 metrge tarta almady. Degenmen, bul - Qazaqstanda alǵash ret bolyp tur. Sondyqtan, biz ony rekord dep esepteımiz jáne tirkeımiz», - dedi ol.

«Naýryz merekesi qarsańynda osy ushaqty 6 metrge tartyp, jańa rekord jasaǵan bolatynmyn. Búgin ókinishke oraı, bir metrge ǵana tarta aldym. Sebebi, búgin biraz jel soǵyp turdy jáne kishigirim jaraqattarym bar. Sol úshin ózimdi qatty qınaǵym kelgen joq. Jalpy, bul - meniń úshinshi rekordym», - dedi Almat Jumanov.

Almat Jumanovtyń jasy 24-te. Ol buǵan deıin de Qazaqstan rekordtar kitabyna engen. Atap aıtqanda, 109 tonnalyq poıyz vagonyn 8,5 metrge súıregen. Odan keıin 300 kelilik túıeni ıyǵyna artyp, bir-birine jalǵanǵan úsh kólikti beline arqanmen baılap, bárin qosyp 13 metrge qozǵaltady.

Sondaı-aq, ol aldaǵy ýaqytta álemdik deńgeıde rekord jasaıtynyn aıtty.

«Mamyr aıynda 300 tonnalyq poıyzdy tartqaly júrmin. Ony oryndasam, álemdik rekord jasaımyn. Sebebi, ony áli eshkim jasaǵan joq. Ózim negizi fıtnes trenermin. Jalpy, bulshyq etterge jattyǵý jasaımyn. Maqsatym - shetelge Qazaqstanda osyndaı myqty jigitter bar ekenin kórsetý. Elimizdiń atyn shyǵarý», - dedi qara kúshtiń ıesi.

Aıta ketsek, Qazaqstan rekordtar kitabyna 2,5 myńnan astam rekord engen.

«Jylyna 30-40 rekord tirkeledi. Biraq, onyń bári kitapqa kirmeıdi. Sebebi, jańa rekord jasalǵan soń, biraz ýaqyttan keıin basqa bireý ony basyp ozýy múmkin. Sondyqtan, bizdiń kitapqa tek eń úzdik, eń myqty adamdardyń esimderi jazylady. Jalpy, álemdik Gınness rekordtar kitabyna qazaqstandyq 20-dan astam adam engen», - dedi Baqytjan Tastúlekov.

Eske salsaq, buǵan deıin QazAqparat tilshisi jalań qolmen alty qatar kirpishti jalǵyz uryp syndyratyn apaıtós jigitpen suhbattasqan bolatyn.