Áskerı tehnıkanyń marsh jasaýyna baılanysty Astana joldarynda qozǵalys shektelýi múmkin

<p>ASTANA.KAZINFORM &mdash; Qarýly kúshterdiń jaýyngerlik daıyndyq baǵdarlamasy sheńberinde búgin Aqmola garnızony áskerı bólimderiniń áskerı qyzmetshileri Astana qalasynyń mańyndaǵy belgilengen aýdandarǵa jaýyngerlik tehnıkamen marsh jasaıdy. Bul týraly Qorǵanys mınıstrliginiń baspasóz qyzmeti málimdedi.</p>

Vedomstvonyń baspasóz qyzmeti málim etkendeı, is-shara garnızon áskerı bólimsheleri kúshteri men quraldarynyń jaýyngerlik ázirligin keshendi tekserýdiń kezekti kezeńine baǵyttalǵan.

«Atalǵan ýaqyt aralyǵynda elordanyń mańynda, sondaı-aq Qaraǵandy trassasynda áskerı tehnıka legi ótip bara jatqan kezde joldarda kólik quraldary qozǵalysynyń ýaqytsha shekteýleri engizilýi múmkin ekenin habarlaımyz» — delingen habarlamada.

Sondaı-aq Qorǵanys mınıstrligi osyǵan baılanysty azamattardan ótip jatqan is-sharalarǵa túsinistikpen qaraýyn jáne tynyshtyq saqtaýyn suraıdy. 

«Áleýmettik jelilerdi paıdalanýshylardan áskerı tehnıkanyń qozǵalysy týraly jalǵan habarlamalar men beınematerıaldar taratpaýdy jáne tek resmı aqparat kózderine senýdi suraımyz» - dep habarlady vedomstvonyń baspasóz qyzmeti.