Áskerı sot Dáýlet Turlyhanovtyń ulyna qatysty isti qaıta qarady

<p>QR Áskerı sotynyń qylmystyq ister jónindegi sot alqasy buzaqylyq nıetpen eki adamnyń densaýlyǵyna qasaqana ortasha aýyrlyqtaǵy zııan keltirgen áskerı qyzmetshi Nurasyl Bolatqa qatysty qylmystyq isti apellıatsııalyq tártipte qarady. Bul jaıynda atalǵan sottyń baspasóz qyzmetinen málim etti, dep habarlaıdy&nbsp;<a href="https://kaz.inform.kz/" target="_blank" rel="noopener">Kazinform.</a></p>

Birinshi saty úkimimen Nurasyl Bolatqa 500 AEK – 1 7125 000 teńge mólsherinde aıyppul salynǵan bolatyn. Zardap shegýshilerdiń paıdasyna 1 mln teńge mólsherinde moraldyq ótemaqy óndirilip alyndy.

Sot aıyptalýshy N.Bolat bıylǵy 11 aqpanda saǵat 02.00 shamasynda «Eva» túngi klýbynyń janynda buzaqylyq nıetpen jábirlenýshi erli-zaıypty Ch.-larǵa qasaqana ortasha aýyrlyqtaǵy dene jaraqatyn keltirgenin anyqtady.

Sottalýshynyń kinási ózi moıyndaǵan aıǵaqtarymen, jábirlenýshiler men kýágerlerdiń aıǵaqtarymen, saraptama qorytyndysymen, oqıǵa bolǵan jerdi tekserý hattamalarymen dáleldendi.

Qylmystyq ister jónindegi sot alqasynyń qaýlysymen úkim memlekettik baj somasy bóliginde 1 725 teńgege deıin tómendetildi. Sonymen qatar sottalýshydan zardap shegýshiniń paıdasyna ókiliniń apellıatsııalyq satyda sotqa qatysqan qyzmetine tólegen 400 myń teńge shyǵyny óndirilip alyndy. Úkimniń qalǵan bóligi ózgerissiz qaldy.

Qaýly zańdy kúshine endi.

Eske sala keteıik, bıyl aqpanda N.Bolat Almatyda zańger Anna Dmıtrıevıch pen onyń kúıeýi Oleg Chernovty soqqyǵa jyqqan edi.

Osy jyldyń qazanynda Almaty qalalyq áskerı sotynyń úkimimen Nurasyl Bolat QK 107-babynyń 2-bóligi 1 jáne 5-tarmaqtarynda kózdelgen qylmys jasaǵany úshin kináli dep tanylyp, oǵan jaza túrinde 1 mln 700 myń teńge aıyppul taǵaıyndalǵan bolatyn.