«Áskerı senim» jobasy: Sarbazdardan qandaı ótinimder túsip jatyr

NUR-SULTAN. QazAqparat - Bir aı buryn áskerı polıtsııa bas basqarmasy armııada bolyp jatqan oqıǵalar týraly aqparat alý úshin saıt jáne mobıldi qosymshany iske qosty. Osy oraıda jańa jobanyń quqyq buzýshylyqpen kúresýdiń, sondaı-aq keri baılanys ornatýdyń jańa quraly retinde qanshalyqty mańyzdy ekenin Qarýly kúshter Áskerı polıtsııasy bas basqarmasynyń ofıtseri podpolkovnık Nurlan Taıǵaraev aıtyp berdi, dep habarlaıdy QazAqparat.

«Áskerı senim» jobasynyń negizgi maqsaty – áskerı polıtsııa organdarynyń áskerı qyzmetshilerimen, olardyń otbasy múshelerimen, azamattyq tulǵalarmen ózara baılanys ornatýy. ıAǵnı, kez kelgen áskerı qyzmetshi, azamattyq tulǵa osy qosymshany óziniń mobıldik telefondaryna ornatyp, olarǵa belgili bolǵan zańsyz áreketter boıynsha bizge habarlama bere alady», - dedi N. Taıǵaraev.

Atap aıtqanda, bul joba iske qosylǵanyna shamamen bir aı boldy.

Áskerı polıtsııasy bas basqarmasy ofıtseriniń aıtýynsha, bir aı ishinde áskerı qyzmetshiler áskerı bólimder men mekemelerde mobıldik qosymshaǵa qosylý ádisteri men múmkindikteri týraly jumys júrgizdi. Qazirgi ýaqytta shamamen 2,5 myń adam qosymshany júktedi.

«Aptasyna shamamen 8-10 habarlama kelip túsedi. Baǵdarlama bastalǵannan beri shamamen 50 habarlama keldi. Habarlama arasynda áskerı qyzmetten zańsyz bosatylǵany týraly aryz, turǵyn úı tólemderi boıynsha shaǵymdar bar. Mysaly, Taraz garnızonynda áskerı qyzmetin ótkerip júrgen sarbazdyń anasy bólim basshylyǵynyń árketteri boıynsha aryzdandy. Gopıtalden shyǵyp, ońaltýda júrgen balasyn kezekshilikke qoıǵan. Osylaısha, ár habar boıynsha tekseris júrgizip, qoldanýshylarǵa jaýabyn beremiz», - dedi Nurlan Taıǵaraev.

Sonymen qatar ol Qazaqstan áskerinde quqyq buzýshylyqpen kúres jaıynda aıtyp berdi.

«Zań buzýshylyqty azaıtý maqsatynda áskerlerde «Armııada qylmysqa oryn joq» baǵdarlamasy júzege asyrylyp jatyr. Onyń aıasynda profılaktıkalyq onkúndik, aılyqtar, ártúrli aktsııa ótkiziledi. Mysaly, sybaılas jemqorlyqqa jol bermeý maqsatynda áskerı qyzmetten bosatý men keıinge qaldyrýǵa usynylǵandar týraly shaqyrý komıssııasynyń sheshimderi qarastyrylýda. Munymen qosa, jyldyń aıaǵyna qaraı, biz qylmystyq quqyq buzýshylyqtyń 10-15%-ǵa tómendeýin kútemiz», - dedi N. Taıǵaraev.

Eske sala keteıik, Qazaqstan Qarýly kúshteriniń Áskerı polıtsııasy bas basqarmasy azamattardan armııadaǵy quqyq buzýshylyqtar týraly aqparat qabyldaý úshin mobıldik qosymshasy bar askeri-senim.kz saıtyn ázirledi.