Áskerı polıtsııanyń patrýl qyzmeti men gaýptvahtaǵa qatysty qaǵıdalary qaıta qaraldy

ASTANA. QazAqparat – Áskerı polıtsııa organdarynyń qyzmetine qatysty birneshe qujat jobalary ázirlendi. Bul týraly QR Qorǵanys mınıstrligi málimetinen málim boldy, dep habarlaıdy QazAqparat tilshisi.

Áskerı polıtsııa bas basqarmasy QR Qarýly kúshteri áskerı polıtsııa organdarynyń patrýldik-bekettik qyzmetiniń is-áreketin uıymdastyrý qaǵıdalaryn qaıta pysyqtady.

Atalǵan ereje aıasynda quqyq tártibin qamtamasyz etýge, qylmysqa jol bermeý, sondaı-aq zań buzý derekterin anyqtaýǵa baǵyttalǵan áskerı polıtsııa organdarynyń patrýldik-bekettik qyzmetin uıymdastyrý tártibi aıqyndalady.

Buıryq jobasynyń tolyq mátinimen «Elektrondyq úkimet» portalyndaǵy «Ashyq NQA» bóliminde tanysýǵa bolady.

Sonymen qatar, Áskerı polıtsııa bas basqarmasy «Qazaqstan Respýblıkasy Qarýly kúshteri Áskerı polıtsııa organdarynyń gaýptvahtasynda ustalatyn áskerı qyzmetshilerdi (ákimshilik qamaýǵa alynǵan áskerı qyzmetshilerden basqa) gaýptvahtadan tys jerde kúzetý jáne alyp júrý qaǵıdalarynyń» jobasyn ázirledi.

Qaǵıdalar áskerı polıtsııa organdarynyń gaýptvahtasynda ustalatyn áskerı qyzmetshilerdi kúzetý tártibin aıqyndaıdy.

Munymen qosa, Áskerı polıtsııa bas basqarmasy QR Qarýly kúshteri Áskerı polıtsııa organdarynyń gaýptvahtasynda kúdiktiler men aıyptalýshylardy ustaý jáne ishki tártip erejelerin qaıta qarady.

Qarýly kúshter gaýptvahtalarynyń qyzmeti Qazaqstan zańnamasynyń normalarymen, Qorǵanys mınıstriniń buıryqtarymen jáne halyqaralyq aktilermen retteledi.

Budan bólek, Áskerı polıtsııa bas basqarmasy QR Qarýly kúshteri Áskerı polıtsııa organdarynyń kólik quraldarynyń qozǵalysy qaýipsizdigin qamtamasyz etý jónindegi qyzmetin uıymdastyrý qaǵıdalaryn qaıta qarady.

Osy oraıda joldaǵy qaýipsizdikti qamtamasyz etý jónindegi bólimshelerdiń qyzmetin uıymdastyrýdyń negizgi mindetteri men tártibi aıqyndalǵan. Onda júrgizýshilerdiń kólik qozǵalysy kezindegi erejelerdi oryndaýyn baqylaý algorıtmi belgilengen.

Qujat jobasynyń tolyq mátinimen «Elektrondyq úkimet» portalyndaǵy «Ashyq NQA» bóliminde tanysýǵa bolady.