Áskerı polıtsııa organdarynyń ókilettikteri keńeıedi

ASTANA. QazAqparat – Búgin Májilistiń jalpy otyrysynda «Áskerı polıtsııa organdary týraly» Zańy men ilespe qujat ekinshi oqylymda qaralyp, qabyldandy, dep habarlaıdy QazAqparat tilshisi.

Depýtat ıÝlııa Kýchınskaıanyń aıtýynsha, bul qujat álemdegi ózgerip jatqan jaǵdaı jáne Qazaqstan Respýblıkasynyń qaýipsizdigine áser etetin ishki jáne syrtqy faktorlar eskerile otyryp, áskerı polıtsııa organdarynyń (ÁPO) ókilettikterin keńeıtýge baǵyttalǵan.

Zań jobasyn talqylaý barysynda Qarýly Kúshter, Ulttyq ulan jáne Ulttyq qaýipsizdik komıteti áskerı polıtsııa organdarynyń ortaq jáne erekshe ókilettikterin bólý jóninde túzetýler engizdi. Sonymen qatar negizgi qyzmet baǵyttaryna sáıkes áskerı polıtsııa organdarynyń mindetterin naqtylaý, áskerı polıtsııa organdarynyń quzyretteri men ókilettikterin aıqyndaý eskerildi.

«Áskerde quqyqtyq tártipti qamtamasyz etý jáne áskerı tártipti saqtaý úshin patrýldik-bekettik qyzmetti júrgizý (patrýldeý) bóliginde ÁPO mindetterin keńeıtý jóninde túzetýler qabyldandy. Sonymen qatar, ÁPO áskerı qyzmetshileriniń qarýdy, arnaýly quraldardy qoldanýyn retteıtin baptar aıtarlyqtaı pysyqtaldy», - dedi ıÝ. Kýchınskaıa.

Іlespe zań qujat Qazaqstan Respýblıkasy zańnamalyq aktileriniń normalaryn «Áskerı polıtsııa organdary týraly» Zańy erejelerine sáıkes keltirýge, sondaı-aq QR Prezıdentiniń QR Qorǵanys mınıstrligi ázirleıtin áskerı josparlaý júıesin bekitý jónindegi ókilettikterin zańnamalyq reglamentteýge baǵyttalǵan.