Áskerı polıtsııa organdarynyń mártebesi men quzyretine qatysty ózgerister engizilmek
Zań jobasy Qazaqstan Respýblıkasy Qarýly Kúshteriniń, Ulttyq qaýipsizdik komıteti men Ulttyq ulannyń áskerı polıtsııa organdarynyń mártebesin, quzyretin, qyzmetin uıymdastyrý men tártibin aıqyndaýǵa baǵyttalǵan. Zań jobasynyń normalary zańnamalyq qamtamasyz etýdiń birtutas júıesin qurýǵa jáne qoıylǵan mindetterdi kelisip oryndaýǵa múmkindik beretin áskerı polıtsııa organdary qyzmetiniń zańnamalyq negizin birizdendirýge baǵyttalǵan.
«Zań jobasy jańa redaktsııada qabyldanady. Bul rette onyń qurylymy ózgertilip, birqatar redaktsııalyq túzetý engiziledi, kemshilikter joıylady. Zań jobasynda áskerı polıtsııanyń mindeti, quzyreti, qurylymy, ókilettigi, ózara is-qımyl jasaýy ózgertilip, fýnktsııasyn zańmen bekitý kózdeledi.
Áskerı polıtsııa organynyń áleýetti vedomstvoǵa qatystylyǵy, baǵyný tártibi, olardyń ózara jáne basqa da memlekettik organmen is-qımyl jasaý tártibi retteledi. Birdeı qoldanyp túsiný úshin «qyzmetker» uǵymy «áskerı qyzmetshi» uǵymymen aýystyrylady. Áskerı polıtsııa organynyń saıası partııadan derbes bolý prıntsıpi engiziledi. Qarýdy, arnaıy quraldy, adam kúshin qoldaný reglamentteledi», - dedi QR Qorǵanys mınıstriniń orynbasary Sultan Qamaletdınov.
Munymen qosa, jalpy otyrysta «Qazaqstan Respýblıkasynyń keıbir zańnamalyq aktilerine áskerı polıtsııa organdary máseleleri boıynsha ózgerister men tolyqtyrýlar engizý týraly» ilespe zań jobasy da talqylandy.
Bul zań jobasynda tıisti normatıvtik aktilerdi «Áskerı polıtsııa organy týraly» negizgi qujatqa sáıkes keltirý qarastyrylǵan. Atap aıtqanda, Qylmystyq, Qylmystyq-protsestik kodekske, «Áskerı qyzmet týraly», «Qorǵanys jáne Qarýly Kúshter týraly», «Quqyq buzýshylyq profılaktıkasy týraly» zańdarǵa ózgerister men tolyqtyrýlar engiziledi.
«Qorǵanys jáne Qarýly Kúshter týraly» Zańda áskerı polıtsııa organyna qatysty Qarýly Kúshterdiń jalpy qurylymyn sáıkes keltirý, Qarýly Kúshter quramyna Arnaıy operatsııa kúshterin engizý, sondaı-aq Prezıdentke Áskerı josparlaý júıesin bekitý, al Qorǵanys mınıstrligine ony ázirleý ókilettigin berý boıynsha tolyqtyrý eskerilgen. Jobany iske asyrý qosymsha qarjy shyǵynyn qajet etpeıdi, teris áleýmettik-ekonomıkalyq, quqyqtyq saldarǵa ákelmeıdi», - dedi mınıstrdiń orynbasary.