Áskerı oqý orynyna túsý kezinde qandaı talaptardy eskerý kerek

ASTANA. QazAqparat – Áskerı joǵary oqý oryndarynda 20-dan astam mamandyq qamtylyp otyr. Bul týraly onlaın brıfıng kezinde Áskerı ǵylymı-zertteý ortalyǵynyń bas ǵylymı qyzmetkeri, polkovnık Erbolat Ádilbaev aıtty, dep habarlaıdy QazAqparat tilshisi.

«Elimizdegi joǵary bilim beretin oqý oryndaryna toqtalsaq, Qurlyq áskerleriniń áskerı ınstıtýty, Radıoelektronıka jáne baılanys áskerı-ınjenerlik ınstıtýty jáne Aqtóbedegi Áýe qorǵanysy kúshteriniń áskerı ınstıtýty bar. Osy ınstıtýttarda 20-dan astam mamandyq boıynsha oqytylady. Osy oraıda motoatqysh, artıllerıst, zenıttik zymyran mamandary, ushqyshtar bar», - dedi E. Ádilbaev.

Sonymen qatar, ol áskerı ınstıtýtqa túskisi keletin jastardyń daıarlyǵyna qatysty túsinik berdi.

«Jastar óz aldyna maqsat qoıyp, psıholoııalyq turǵyda, densaýlyǵy jaǵynan jaqsy bolýy kerek. Bilim jaǵynan da qalys qalmaı, Ulttyq birińǵaı testileýge daıyndalýy qajet. Óıtkeni, bizdiń áskerı joǵarǵy oqý oryndarynda matematıka, fızıka pánderi de mańyzdy ról atqarady. Daıyndyq tek emtıhan bastalar kezde ǵana emes, aldyn ala júrgizilýi shart. Máselen, biz ózimiz ofıtser bolamyz dep 5-7 synyptan bastap armandaǵan edik. Bylaısha atqanda, tynbaı daıyndalýy kerek», - dedi polkovnık.

Onyń aıtýynsha, oqýǵa túsetinderge tıisti jeńildikter qarastyrylǵan. Bul rette kópbalaly otbasylarǵa, áskerı qyzmetshilerdiń balalaryna, merzimdi áskerı boryshyn ótep júrgen sarbazdarǵa jeńildikter bar.

«Oqý ornyna túsýge kelgen jastardyń kıimi, tamaǵy barlyǵy tegin bolady. Oqý ornyn aıaqtap, «leıtenant» shenin alǵannan keıin jumys ornymen qamtamasyz etiledi», - dedi Erbolat Ádilbaev.