Áskerı oqý ornynda Málik Ǵabdýllınge arnalǵan eskertkish buryshy ashyldy
Bul týraly QazAqparat QR Qorǵanys mınıstrliginiń baspasóz qyzmetine silteme jasap habarlaıdy.
Baspasóz qyzmetiniń málimetterine qaraǵanda, atalǵan shara jazýshy, professor, KSRO Pedagogıka ǵylymdary akademııasynyń naqty múshesi, Keńes Odaǵynyń batyry Málik Ǵabdýllınniń 105 jyldyǵy qurmetine arnaldy. Oǵan oqý ornynyń professorlyq-oqytýshylyq quramy men tyńdaýshylary qatysty.
«Málik Ǵabdýllınge arnalǵan eskertkish buryshynyń ashylýy men oǵan joǵary oqý ornynan fakýltettiń ataýy berilýi úlken qurmet pen jaýapkershilik», - dep Ulttyq qorǵanys ýnıversıtetiniń bastyǵy general-leıtenant Sultan Qamaletdınov atap ótti.
Málik Ǵabdýllın Ekinshi Dúnıejúzilik soǵysqa general-maıor I. Panfılov atyndaǵy 8-shi gvardııalyq atqyshtar dıvızııasynyń quramynda qatysqan bolatyn. 1942 jyly Novgorod oblysyndaǵy urysta sarbazdar tobyn basqardy.
Jaýmen shaıqasta olardyń sanynyń basymdyǵyna qaramastan, nemistiń eki tankin granatamen jaryp, kóptegen jaý áskerin joıdy jáne 12 jaýdy tutqynǵa aldy. Málik Ǵabdýllın jaralansa da, shaıqasa berdi. Aǵa tárbıeshi Málik Ǵabdýllınge osy erligi úshin Keńes Odaǵynyń batyry ataǵymen birge «Lenın» ordeni jáne «Altyn juldyz» medali tabys etildi.
Batyrdyń esimi ortalyq kósheler men mektepterge berilgen. 1995 jyly Tuńǵysh Prezıdent Nursultan Ábishuly Nazarbaevtyń qatysýymen Kókshetaý qalasynda Málik Ǵabdýllınniń elimizdegi alǵashqy murajaıy ashylǵan bolatyn.