Áskerı mindetin ótegenderge qandaı jeńildikter usynylady

ASTANA. QazAqparat – Ortalyq kommýnıkatsııalar qyzmetinde ótken brıfıngide Qorǵanys mınıstriniń orynbasary Darhan Ahmedıev «Srochnıkı 2.0» jobasynyń qalaı iske asyp jatqanyn málim etti, dep habarlaıdy QazAqparat tilshisi.

«Bilim berý jeńildikterin berý arqyly merzimdi áskerı qyzmettiń ýájdemesin arttyrý boıynsha «Srochnıkı 2.0» jobasy iske asyryldy. «Srochnıkı 2.0» tsıfrlyq platformasy elimizdiń joǵary oqý orny esebinen bilim alý úshin merzimdi qyzmettiń áskerı qyzmetshileri arasynda konkýrstyq irikteý júrgizýge múmkindik beredi. Bul júıede merzimdi áskerı qyzmetshilerdiń barlyq baǵalaryn olardy aýystyrý múmkindiginsiz kórsetiledi. Júıe merzimdi áskerı qyzmetshilerdiń reıtıngin olardyń qorytyndy baǵalary boıynsha avtomatty túrde qurastyrady jáne avtomatty túrde joǵary oqý oryndaryna taratady», - dep túsindirdi Darhan Ahmedıev OKQ-da ótken brıfngide.

Mınıstrdiń orynbasary atap ótkendeı, merzimdi áskerı mindetin ótegen azamattarǵa myna jeńildikter usynylady:

- qyzmet aıaqtalǵannan keıin 2 jyl ishinde aqyly negizde UBT-ny eseptemegende joǵary oqý ornyna (JOO) túsý;

- UBT esebinsiz JOO esebinen óteýsiz negizde jaýyngerlik daıarlyq jáne áskerı tártip boıynsha joǵary nátıje kórsetken tulǵalardyń JOO-ǵa túsýi;

- JOO áskerı kafedrasyna túsý emtıhandarynsyz, óteýsiz negizde túsý (ıaǵnı, azamat JOO-da aqyly nemese tegin bilim alady);

- Qorǵanys mınıstrliginiń joǵary oqý oryndaryna emtıhan tapsyrmaı túsý. Olardy Qarýshy Kúshterdiń áskerı bólimderinde buryn júrgizilgen qabyldaý nátıjeleri boıynsha júzege asyrylady.

«Bilim alý úshin 1500 oryn bólindi, ishinde Qorǵanys mınıstrliginiń joǵary oqý oryndarynda – 850 oryn. Jalpy konkýrstyq irikteýge 12 548 sarbaz qatysty», - dep toqtaldy Darhan Ahmedıev.

Sondaı-aq spıker 17 jastaǵy balalardy avtomatty túrge áskerı esepke qoıýdan 1 mlrd teńge únemdeletinin aıtty.

Buǵan qosa, áskerden jaltarý úshin jalǵan anyqtama jasaǵandar anyqtalǵan.