Áskerı mektep kýrsanttary aýyr syrqaty bar balalarǵa qan tapsyrdy

NUR-SULTAN. QazAqparat – QR Qorǵanys mınıstrligi Áskerı-tehnıkalyq mektebi Almaty fılıalynyń tárbıelenýshileri aýyr syrqaty bar balalarǵa óz erkimen qan tapsyrdy, dep habarlaıdy QazAqparat.

«Ómir súrýge úmit syıla» aktsııasyn áskerı-tehnıkalyq mekteptiń ujymy uıymdastyrǵan. Oǵan 19 kýrsant qatysyp, medıtsınalyq tekserýden ótkennen keıin 7 500 mıllılıtrden astam qan tapsyrdy.

«Donor bolý – azamattyq paryzym. Onyń tipti densaýlyqqa da paıdasy zor. Densaýlyǵym jaqsy, salaýatty ómir saltyn ustanamyn. Durys tamaqtanýǵa tyrysamyn. Eger men tapsyrǵan qan bireýdiń ómirin aman alyp qalýǵa jarasa, men oǵan shyn júrekten qýanamyn», – dedi mekteptiń kýrsanty Jarymhan Dastan.

Mınıstrliktiń baspasóz qyzmetinen málim etkendeı, osyndaı ıgi ister áskerı-tehnıkalyq mekteptiń dástúrine aınalǵan. Donorlyq qan tapsyrýǵa júıeli qatysýdan basqa mektep tárbıelenýshileri ardagerlerge qamqorlyq jasaý jáne áskerge shaqyrylatyn jastarmen kezdesýler ótkizip turady.

«Tárbıelenýshilerdiń bastamasy boıynsha oqý jylynyń basynda tirek-qımyl apparaty buzylǵan balalarǵa arnalǵan mektep-ınternat oqýshylaryna kómek kórsetildi, sondaı-aq oqý ornynyń aýmaǵy abattandyryldy. Bul aktsııaǵa áskerı-tehnıkalyq mekteptiń 30-dan astam kýrsanty qatysty», - delingen habarlamada.