Áskerı qyzmetshilerge memlekettik nagradalar men shender tabystaldy

ASTANA. QazAqparat – Kásibı mereke qarsańynda Qorǵanys mınıstrliginde Qazaqstan Qarýly kúshteriniń úzdik áskerı qyzmetshileri men qyzmetkerlerine qurmet kórsetildi, dep habarlaıdy QazAqparat vedomstvonyń baspasóz qyzmetine silteme jasap.

Qorǵanys vedomstvosynyń basshysy general-polkovnık Rýslan Jaqsylyqov óskeleń urpaqty áskerı-patrıottyq tárbıeleý isinde Otan qorǵaýshylar jáne Uly Jeńis kúniniń mańyzdylyǵyn atap ótti.

«Ol soǵys adamzat sanasynda óshpes iz qaldyrdy. Órkenıet tarıhyndaǵy eń qaıǵyly betterdiń birine aınaldy. Otandy agressordan qorǵaýda qazaqstandyq jaýyngerler erekshe erlik pen qaharmandyqtyń ozyq úlgisin kórsetti», - dedi mınıstr.

General-polkovnık Rýslan Jaqsylyqov búkilarmııalyq keńeste Prezıdent áskerı qyzmetshilerdiń armııanyń joǵary jaýyngerlik daıyndyǵyn qoldaý men memlekettiń qorǵanys qabiletin qamtamasyz etý isindegi jetistikterin joǵary baǵalaǵanyn atap ótti.

«Qarýly kúshterdiń barlyq jeke quramynyń qyzmetine joǵary baǵa berý bizge úlken jaýapkershilik júkteıdi», - dedi mınıstr.

Qyzmette qol jetkizgen jetistikteri úshin Qarýly kúshterdiń birqatar áskerı qyzmetshisi Prezıdent Jarlyǵyna sáıkes memlekettik nagradalarmen marapattaldy. Ony general-polkovnık Rýslan Jaqsylyqov tabys etti.

II dárejeli «Dańq» ordeni Qarýly kúshter Tylynyń bastyǵy general-maıor Almaz Ahmadıevke, «Qurmet» ordeni bas ınspektor - Qorǵanys mınıstriniń kómekshisi Aıgúl Tólembaevaǵa, «Jaýyngerlik erligi úshin» medalimen Arnaıy tehnıkalyq ázirlemeler bas basqarmasynyń bastyǵy polkovnık Tımýr Sádýaqasov, 21450 áskerı bóliminiń dıvızıon komandıri maıor Qadyrjan Qalı jáne 44859 áskerı bólimi ınjenerlik-saperlik batalonynyń aǵa mamany kishi serjant Іlııas Qurmanbek marapattaldy.

Úlgili qyzmeti jáne qyzmettik mindetterin adal atqarǵany úshin qorǵanys vedomstvosy basshysynyń buıryǵymen tórt ofıtserge merziminen buryn áskerı ataqtar berildi. General-polkovnık Rýslan Jaqsylyqov 44841 áskerı bóliminiń áskerı qyzmetshisi Marlen Gızzatovqa jáne 18404 áskerı bólimi desanttyq-shabýyldaý batalonynyń komandıri Jolaman Erdáýletulyna kapıtan, 27943 áskerı bólimi mınomet batareıasynyń komandıri Dýman Abaıǵa jáne 75263 áskerı bóliminiń rota komandıri Asylbek Bolysbekke maıor áskerı ataǵyn berdi.

Qarýly kúshter boıynsha barlyǵy 26 áskerı qyzmetshi men azamattyq personal memlekettik nagradalarmen marapattaldy. 36 ofıtserge merziminen buryn áskerı ataqtar berildi.

Eske salsaq, Prezıdenttiń joǵary áskerı jáne arnaýly ataqtar, synyptyq shender berý týraly jarlyǵy jarııalanǵan bolatyn.