Áskerı qyzmetshilerdiń azamattyq medıtsınalyq mekemege júginýge quqyǵy bar - maman

NUR-SULTAN. QazAqparat – Áskerı medıtsına quzyretine kirmeıtin aýrýlar bolady, sondyqtan áskerı qyzmetshilerdiń azamattyq medıtsınalyq mekemege júginýge quqyǵy bar. Bul týraly onlaın-brıfıngide Bas áskerı-medıtsınalyq basqarma bastyǵynyń orynbasary - emdeý-profılaktıka basqarmasynyń bastyǵy, medıtsına qyzmetiniń polkovnıgi Berik Іlııasov málim etti, dep habarlaıdy QazAqparat.

«Onkologııa kezinde biz qyzmet kórsetpeımiz. Sondaı-aq, 18-ge tolmaǵan balalarǵa kómek kórsetpeımiz. Bala týý isine aralaspaımyz. Sonymen qatar, joǵary tehnologııalyq medıtsınalyq qyzmetterdiń ishinde neırohırýrgııa, kardıohırýrgııa, travmatologııa salasyndaǵy sharalarymyz bastapqy kezeńde bolyp tur», - deıdi ol.

Aıtýynsha, áskerı qyzmetshilerdiń azamattyq medıtsınalyq mekemege júginýge quqyǵy bar.

«Qazaqstan Respýblıkasynyń «Halyq densaýlyǵy jáne densaýlyq saqtaý salasy týraly» kodeksine sáıkes azamattar dárigerdi jáne medıtsınalyq mekemeni tańdaýǵa quqyly jep jazylǵan. Soǵan baılanysty bizdiń áskerı qyzmetshiler azamattyq medıtsınalyq mekemege júginýge quqyǵy bar. Áskerılerge barlyq jaǵdaı jasalǵan. Olar jergilikti tirkelgen emhanalarǵa, sonymen birge áleýmettik saqtandyrý boıynsha úkimet qarajaty esebinen saqtandyrylǵan. Sondyqtan, bizdiń áskerıler jalpy azamattyq densaýlyq saqtaý júıesinde tolyq em qabyldaýǵa quqyly», - deıdi Berik Іlııasov.

Sondaı-aq, ol áskerı qyzmetshilerdiń shet elder klınıkalarynda emdelýi jáne áskerı qyzmetshilerdi sanatorlyq-kýrorttyq emmen qamtamasyz etý týraly da aıtyp berdi.

«Shetelde em berý tártibi QR Densaýlyq saqtaý mınıstriniń buıryǵyna sáıkes bekitilgen. Eger áskerı qyzmetshi sol tizimge kiretin bolsa, onda ol shetelde em alýyna bolady. Onyń ústine, áskerı qyzmetshi áskerı qyzmeti kezinde jaraqat alsa, ol jaraqatty Qazaqstanda emdeı almaıtyn bolsa, ol shetelge barýǵa quqyly.

Sanatorlyq-kýrorttyq emdeý áskerı qyzmetshilerge jáne áskerı zeınetkerlerge «QR Áskerı qyzmet jáne áskerı qyzmetshiniń mártebesi týraly» Zańǵa sáıkes bekitilgen. Zańǵa baılanysty qazir áskerı qyzmetshiler jáne 25 jyl ótili bar áskerı qyzmetshiler sanatorlyq-kýrorttyq em alýǵa quqyly. Áskerılerge sanatorlyq-kýrorttyq em qabyldaý úshin medıtsınalyq kórsetkishter bizdiń Qorǵanys mınıstrliginiń buıryǵymen bekitilse, áskerı zeınetkerlerge arnalǵan tizim Densaýlyq saqtaý mınıstriniń buıryǵymen bekitilgen. Eger de tizimdegi naýqastaný bolsa, olar sanatorlyq-kýrorttyq em alýǵa joldanady. Bıyl 1 100 joldama aldyq. Saryaǵash qalasynda jáne Qaraǵandy oblysyndaǵy sanatorıılerge. Jospar boıynsha emdeýge jiberý jumysy júrgizilip jatyr», - dedi Berik Іlııasov.