Áskerı qyzmetshiler tótenshe jaǵdaı rejimin qamtamasyz etýge kiristi

NUR-SULTAN. QazAqparat - Áskerı qyzmetshiler ishki ister organdarymen ózara jumys istep, polıtsııa qyzmetkerlerine kómektesedi, sondaı-aq birlesken patrýldeýge qatysady, dep habarlaıdy QazAqparat tilshisi.

Áskerı qyzmetshiler jergilikti eldi mekenderderdi patrýldeý jáne karantındik aımaqtarda blok beketterdi kúsheıtý, adamdar qozǵalysynyń tez rettelýi men vırýstyń el aýmaǵyna taralýyn azaıtýǵa kómektesedi.

«Azamattardyń densaýlyǵyn qorǵaýǵa qajetti medıtsınalyq kómek kórsetýge áskerı medıtsınalyq mekemeler de daıyn. 24 dáriger-meıirbıkelik brıgada quryldy. Sondaı-aq Densaýlyq saqtaý mınıstrligimen ózara is-qımyl uıymdastyryldy. Armııa azamattardyń kez kelgen suraýyna ún qatýǵa jáne jan-jaqty kómek kórsetýge daıyn», - deıdi QR QK Qurlyq áskerleriniń Bas qolbasshysy, general-maıor Marat Hýsaınov.

Sonymen qatar, koronavırýs ınfektsııasymen kúresý úshin QR Qarýly kúshteriniń bıologııalyq bólimshesi tartyldy. Jeke quram, arnaıy tehnıka men quraldar qaýip tóndiretin aýmaqtar men nysandarǵa dezınfektsııa júrgizýge daıyn.