Áskerı qyzmetshiler Golovkınge qoldaý bildirip, fleshmob uıymdastyrdy

AQTAÝ. QazAqparat – Aqtaý garnızonyndaǵy teńiz jaıaý áskerleri brıgadasynyń áskerı qyzmetshileri boksshy Genadıı Golovkınge jekpe-jegi aldynda qoldaý bildirip, fleshmob uıymdastyrdy, dep habarlaıdy qazAqparat.

QR Qorǵanys mınıstrliginiń baspasóz qyzmetinen málim etkendeı, 300-den astam áskerı qyzmetshi GGG áripteri retinde alańda sap túzep turdy.

«Biz, Qarýly kúshterdiń áskerı qyzmetshileri, otandasymyzdyń jetistikterin jiti baqylap otyramyz. Biz – óz elimizdiń jaýyngerleri, Qazaqstannyń beıbitshiligi men tynyshtyǵyn qorǵaımyz, al Gennadıı Golovkın álemdik arenada Týymyzdy kóterip keledi. Biz oǵan qoldaý bildiremiz jáne jeńisine senemiz», - dedi gvardııalyq teńiz jaıaý áskeri quramasynyń komandıri podpolkovnık Jannur Satqynov.

Áskerı qyzmetshiler úshin boks mańyzdy ról atqarady. Ol qaısarlyqty, tártipti, jeńiske jetýge degen umtylysty qalyptastyrady.

Aıta keteıik, ótken jyldyń qyrkúıek aıynda bokstan Qazaqstan Qarýly kúshteriniń quramasy Máskeýde ótken áskerı qyzmetshiler arasyndaǵy álem chempıonatynda 7 medal jeńip aldy, onyń úsheýi – altyn.

Eske salaıyq, Golovkın-Alvares jekpe-jegi 18 qyrkúıek kúni (astana ýaqytymen) Las-Vegastyń (SShA) T-Mobile Arena kesheninde ótedi.

Qazaqstandyqtar boks keshin «Qazaqstan» jáne «Qazsport» telearnalarynan tikeleı efırden kóre alady. Bastalýy – 18 qyrkúıek, saǵat 05:00. Basty aıqas shamamen 08.00-de bastalady.

GGG men «Kanelo»-nyń 2017 jyly ótken alǵashqy aıqasy tóreshilerdiń túrli daýysymen teń aıaqtalǵan edi. 2018 jyly bolǵan rematch tóreshilerdiń basym daýysymen Alvarestiń paıdasyna sheshildi. Trılogııa sýperorta salmaqta (birinshi jáne ekinshi kezdesýler orta salmaqta ótken bolatyn) ótedi. Qazir bul sanattaǵy barlyq chempıondyq tıtýl «Kaneloǵa» tıesili. Al Golovkınniń enshisinde WBA Super, IBF jáne IBO nusqalary boıynsha orta salmaqtaǵy beldikter bar.