Áskerı qyzmetshiler Aýǵan jaýyngerlerin eske aldy

NUR-SULTAN. QazAqparat - Qazaqstan Qarýly Kúshteriniń áskerı bólimderi men mekemelerinde Keńes áskerleriniń Aýǵanstannan shyǵarylǵanyna 33 jyl tolýyna oraı is-sharalar ótti, dep habarlaıdy QazAqparat Qr Qorǵanys mınıstrliginiń baspasóz qyzmetine silteme jasap.

Internatsıonalıst jaýyngerlerdiń eskertkishterine gúl shoqtary qoıyldy. Aýǵanstandaǵy urys is-qımyldaryna qatysqan ardagerlerimen áskerı qyzmetshilerdiń kezdesýleri, «Jas sarbaz» áskerı-patrıottyq qozǵalysynyń tárbıelenýshileri arasynda erlik sabaqtary uıymdastyryldy. Aýǵan soǵysynyń ardagerleri patrıotızmniń, Otanǵa adal qyzmet etýdiń jáne áskerı boryshty oryndaýǵa ázir bolýdyń mańyzdy ekenin aıtty.

Nur-Sultan qalasyndaǵy Qarýly Kúshterdiń Ulttyq áskerı-patrıottyq ortalyǵynda aýǵan jaýyngerlerine arnap kórme men kontsert uıymdastyryldy.

Keńes áskerleriniń sońǵy legi Aýǵanstannan 1989 jyldyń 15 aqpanynda shyqty. Aýǵanstandaǵy áskerı is-qımyldarǵa qatysýshylar ózderiniń áskerı boryshyn abyroımen atqaryp, qazirgi áskerı qyzmetshiler úshin batyrlyqtyń, erliktiń úlgisi bolyp tabylady.

Resmı statıstıkaǵa súıensek, Aýǵanstandaǵy soǵys qımyldaryna 22 myńǵa jýyq qazaqstandyq qatysty. Olardyń 900-den astamy qaza tapty, 21 adam habar-osharsyz ketti. Atap ótsek, 4 300-den astam qazaqstandyq jaýynger ordendermen jáne medaldarmen marapattaldy, olardyń altaýy Keńes Odaǵynyń batyry, bireýi – Halyq Qaharmany ataǵyn aldy.

Búginde elimizde 15 myńnan astam ınternatsıonalıst-jaýynger turady. Kóbi eldiń qoǵamdyq ómirine belsendi qatysyp, jastardy áskerı-patrıottyq tárbıeleý jumysyna atsalysady.